6 aqpanda Syrtqy ister ministriniń orynbasary Erjan Ashyqbaev ótken senbide túnde Nur-Sultanǵa ushyp kelgen AQSh memlekettik hatshysy "Maik Pompeony qarsy alý" kezindegi kiimge bailanysty synǵa jaýap berdi. Buǵan deiin áleýmettik jeli qoldanýshylary AQSh memlekettik hatshysyn qarsy alǵan ministrlik ókilderiniń "iskerlik etikany" saqtamaǵanyn synap, olardyń diplomattardan góri "áýejaida shetel azamatyn qarsy alǵan taksisterge kóbirek uqsaǵanyn" aitqan edi.
Erjan Ashyqbaev ministrlik ókilderine aitylǵan synnan habardar ekenin jetkizip, degenmen bul máselede "sapardyń mánine kóbirek nazar aýdarǵan jón bolar edi" dedi.
- Aitylǵan syn oryndy dep aitamyz. Aýa-raiynyń jaǵdaiyna bailanysty kiindi. Olardyń ishinde men de barmyn. Sondyqtan bul máselede endi máseleniń máninen góri sáni aldyńǵy jaqqa shyǵyp ketti. Sondyqtan jasalǵan sapardyń mánine nazar aýdarǵan jón bolar edi, - dedi Erjan Ashyqbaev.
Buǵan deiin áleýmettik jeli qoldanýshylary qazaqstandyq diplomattardyń Pompeony qarsy alý rásimin synap, olarǵa "túsindirme jumystaryn júrgizý kerek" dep aitqan.
"Pompeony qarsy alǵan diplomattarǵa bári kúlip jatyr. Olar taksister siiaqty - qara kýrtka, qulaqshyn kiip, qoldaryn qaltaǵa salyp turdy. Aq jeide, galstýgy bar, paltomen tymaqsyz túsken Pompeo jastardyń janynda ozyq bop turdy" dep jazdy Aidan Káribjanov Facebook paraqshasynda.
Burynǵy diplomat Qazbek Beisebaev "árine, aýa raiy bizde [qarsy alý] protokolyn sál ózgertýge májbúr etetin shyǵar, biraq memlekettik hatshyny kýrtkamen qarsy almaidy" dep qazaqstandyq diplomattarǵa túsindirme jumystary qajet ekenin aitqan.
"Syrtqy ister ministrlik ókilderine úlken sheneýnikter túsindirme jumystaryn júrgizý kerek, mundai jaǵdaida kúńgirt tústi palto kiiý kerek. Pompeonyń ózi paltoda boldy" dep jazdy Qazbek Beisebaev Facebook-taǵy paraqshasynda.
Qazaqstannan keiin Maik Pompeo Ózbekstanǵa barǵan. Áleýmettik jeli qoldanýshylary Tashkentte Pompeony "qajetti dárejede" qarsy alǵanyn atap ótti.
