Almatyda 3 qarasha kúni ótken “Qazaq arýy – 2026” baiqaýyndaǵy bir sát áleýmettik jelide qyzý talqylandy. Júrgizýshi Asha Mataidyń Taiaý Shyǵystaǵy qaqtyǵys týraly suraǵyna qatysýshylardyń biri birden jaýap bere almai, abdyrap qalǵan, dep habarlaidy ult.kz.

Baiqaýǵa qatysýshy suraqtyń mánin birden túsine almaǵan. Osy sáttiń videosy jelige tarap, sulýlyq saiysynda qandai taqyryptar qozǵalǵany jón degen pikirtalasqa ulasty.

Jeli qoldanýshylarynyń bir bóligi saiasat pen dinge qatysty kúrdeli máselelerdi mundai baiqaýda kóterýdi orynsyz dep baǵalady. Olardyń pikirinshe, halyqaralyq qaqtyǵystar týraly suraqqa sahnada birden jaýap berý ońai emes.

Biylǵy baiqaýda Almatynyń atynan qatysqan 20 jastaǵy stýdent ári bloger Asylym Ótepbergen jeńimpaz atandy. Ol kórermenderdiń 17 164 daýysyn jinaǵan. Jeńimpazǵa dizainer Aida Kaýmenova ázirlegen avtorlyq shapan men shetelge saiahat joldamasy tabystaldy.

“Qazaq arýy – 2026” baiqaýyn Baian Alagózovanyń BM Production prodiýserlik ortalyǵy uiymdastyrdy.

Aita keteiik, Túrkiiada demalyp júrgen Asha Matai tosyn jazba jariialady.

Asha Matai kim?

Asha Matai – qazaqstandyq telejúrgizýshi, ánshi jáne aktrisa. Shyn esimi – Aqbota Maratqyzy Asqarbekova. Ol 1988 jylǵy 22 jeltoqsanda dúniege kelgen. Mektepten keiin ál-Farabi atyndaǵy Qazaq ulttyq ýniversitetiniń halyqaralyq qatynastar fakýltetinde halyqaralyq quqyq mamandyǵy boiynsha bilim alǵan. Stýdent kezinde shyǵarmashylyqqa bet buryp, “Sana” triosynyń quramynda án aitqan.

Televiziiadaǵy eńbek jolyn 2008 jyly HitTV mýzykalyq arnasynda bastaǵan. Keiin oiyn-saýyq baǵdarlamalary men kontsertterdiń júrgizýshisi retinde tanyldy. Ol “Shabyt”, “Jahan dala” baiqaýlarynyń laýreaty, respýblikalyq “Juldyzdar imperiiasy” telebaiqaýynyń jeńimpazy atanǵan. Sonymen qatar úlken tennisten sport sheberligine kandidat ataǵy bar.

Asha Matai kino salasynda da birqatar ról somdaǵan. Doshan Joljaqsynovtyń “Birjan sal” filminde Láilimniń beinesin alyp shyqty. Sondai-aq “Astana – ǵashyqtar mekeni”, “Obratnaia storona”, “Janym-2”, “16 qyz” jáne “Samaia krasivaia” týyndylaryna túsken. Onyń shyǵarmashylyq jolynda ánshilik, akterlik jáne telejúrgizýshilik qatar órbidi.

2015 jylǵy qyrkúiekte Asha Matai Mysterions tobynyń ánshisi Arman Qońyrbaevpen shańyraq kóterdi. Ekeýi “Synaq” baǵdarlamasynyń túsiriliminde tanysqan. Olardyń Asylym jáne Aiym esimdi qyzdary bar. Ónerli jup birlesip án jazyp, beinebaiandar da shyǵarǵan. Solardyń qatarynda “Jaralamaǵyn” jáne “Aý, janym” týyndylary bar.