Arzan qant izdegen oraldyqtar alaiaqtarǵa jem bolyp jatyr. Óitkeni óńirde sheker tapshy. Al qysqa qamdanǵan halyq qapshyqtap satylatyn qumsheker izdep, saýda ortalyqtary men bazarlarda sabylyp júr. Arzan qant izdegenderdiń osal tusyn alaiaqtar da paidalanyp qalyp jatyr. Politsiia dereginshe, qumsheker satamyn dep halyqtyń qaltasyn qaqqan alaiaqtarǵa qatysty qylmystyq is qozǵalǵan, dep habarlaidy "Ult aqparat" "Astana" telearnasyna silteme jasap.
Qazir bazarda jemis-jidek pen kókónis arzan. Biraq túrli qainatpa jasap, qysqa qamdaný úshin qant tapshy. Dúkende adam basyna 2-3 keliden ǵana satylatyn qumsheker banki jabýǵa jetpeidi.
"Jaqynda 25 kilogramdyq sekerdi 16 myń teńgege alyp edim. Búgin barsam, 200 teńgege qymbatsyp ketken. Jylda 300 banki jabatyn edim. Biyl 100 banki jabatyn shyǵarmyn. Seker qymbat" - deidi qala turǵyny Sara Úmbetiarqyzy.
Halyqtyń qant qansha qymbattasa da, satyp alýǵa ázir ekenin alaiaqtar da jaqsy biledi. Qazir ondailar internet arqyly túrli habarlandyrý berip, ańqaý eldi aldap, tabys taýyp jatqan kórinedi.
"Biz Shymkent qalasynanbyz. Qanttyń kilogramy - 340 teńge. Qalasańyz, birneshe tonna qantty Oralǵa tegin jetkizip beremiz. Biraq jeke kýáligińizdiń sýretin jiberip, taýardyń jarty aqshasyn aldyn-ala aýdarasyz. Qalǵan aqshany keiin tóleisiz. Sodan keiin sizge esepshilerimiz qujattardy jiberedi" - deidi alaiaqtardyń biri.
Politseiler mundai kóleńkeli isti áshkereleý ońai emes dep otyr. Óitkeni alaiaqtyqtyń bul túri búginde halyqaralyq deńgeige jetken. Iaǵni, basqa eldegi pysyqtar azamattardyń jeke kýáligin paidalanyp, internet arqyly nesie rásimdei alady. Sondyqtan arzan qumshekermen qýantamyn degenderge senbeýdi suraidy.
"Habarlandyrý saity arqyly 5 qapshyq qumsheker satyp almaq bolǵan oraldyq bir azamat aldanyp qaldy. Aldanǵanyn aqshasyn aýdaryp jibergen soń, bir bilgen. Kelgen shyǵyn - 30 myń teńge. Qazir sotqa deiingi tergeý amaldary bastaldy" - deidi BQO PD kriminaldyq politsiia basqarmasynyń jedel ýákili Iliias Muqanov.
Politsiia dereginshe, búginde internet-alaiaqtyq órship barady. Óitkeni aldanýshy barda aldaýshy qashan da tabylady. Mysaly, 2017 jyly nebary 26 internet-alaiaqtyq tirkelse, byltyrdyń ózinde bul qylmys 26 esege kóbeiipti. Buǵan deiin eldi bank qyzmetkerimin dep aldaityndardyń qataryna endi «qant saýdagerleri» qosyldy.
