Jańa jyl meiramy qarsańynda internet jelisinde onlain-saýda jandana tústi. Syilyqtarǵa suranystyń artqanyn baiqaǵan alaiaqtar da aldap-arbaýdyń jańa túrlerin oilap tabýda, dep habarlaidy "Ult aqparat".
Máselen, elorda politsiiasyna qala turǵyndarynan birneshe shaǵym túsip úlgergen. Qyz-kelinshekter áleýmettik jeli arqyly brendti uialy telefondardyń sońǵy úlgilerine tapsyrys berip, jetkizý qyzmeti úshin de aqy tólegen.
«Jańajyldyq jeńildikter kórsetilgen kóztartarlyq akkaýnt elordalyq boijetkenderdiń nazaryn ózine aýdarǵan. Alaiaqtyń elektrondy ámiianyna aldyn ala tólem jasaǵan olardyń barlyǵy da taýardyń bar-joǵyna kóz jetkizbegen. Ámiianǵa aqsha túskennen keiin akkaýnt buǵattalyp, al elektrondy ámiian identifikatsiialanbai qalǵan. Osylaisha zardap shegýshiler aqshasyz da, syilyqsyz da qalyp otyr», - dep atap ótedi Nur-Sultan qalalyq Politsiia departamentinen.
Tergeý amaldary barysynda politsiia qyzmetkeri Almaty qalasynda turatyn Resei azamatshasyn ustady. Áieldiń uialy telefondar satýmen ainalysýǵa nieti de bolmaǵan. Al akkaýntty aldaý maqsatynda ashqan. Zardap shegýshilerden túsken aqshany qajetine jaratyp úlgergen.
Qazirgi ýaqytta zardap shegýshilerdiń naqty sany anyqtalýda. Kúdiktige qatysty sotqa deiingi tergeý amaldary qolǵa alynǵan. Jalpy materialdyq shyǵyn 600 myń teńge mólsherinde baǵalanyp otyr.
Osyǵan orai Nur-Sultan qalalyq Politsiia departamenti azamattarǵa mynadai qarapaiym saqtyq sharalaryn ustanýǵa keńes beredi:
- videobailanys arqyly taýardyń bar ekendigine kóz jetkizý qajet;
- tólemdi taýardy qolǵa alyp, ony teksergennen keiin ǵana aýdarý kerek.
Internet-saýdadaǵy alaiaqtyqtyń belgileri:
- satýshynyń telefony men mekenjaiy kórsetilmeidi;
- satýshymen bailanysty tek jazba arqyly júrgizýge usynady;
- taýar baǵasy ózge satýshylar usynǵan dál sondai zattyń baǵasymen salystyrǵanda tym tómen bolady.
