جاڭا جىل مەيرامى قارساڭىندا ينتەرنەت جەلٸسٸندە ونلاين-ساۋدا جاندانا تٷستٸ. سىيلىقتارعا سۇرانىستىڭ ارتقانىن بايقاعان الاياقتار دا الداپ-ارباۋدىڭ جاڭا تٷرلەرٸن ويلاپ تابۋدا, دەپ حابارلايدى "ۇلت اقپارات".
مەسەلەن, ەلوردا پوليتسيياسىنا قالا تۇرعىندارىنان بٸرنەشە شاعىم تٷسٸپ ٷلگەرگەن. قىز-كەلٸنشەكتەر ەلەۋمەتتٸك جەلٸ ارقىلى برەندتٸ ۇيالى تەلەفونداردىڭ سوڭعى ٷلگٸلەرٸنە تاپسىرىس بەرٸپ, جەتكٸزۋ قىزمەتٸ ٷشٸن دە اقى تٶلەگەن.
«جاڭاجىلدىق جەڭٸلدٸكتەر كٶرسەتٸلگەن كٶزتارتارلىق اككاۋنت ەلوردالىق بويجەتكەندەردٸڭ نازارىن ٶزٸنە اۋدارعان. الاياقتىڭ ەلەكتروندى ەمييانىنا الدىن الا تٶلەم جاساعان ولاردىڭ بارلىعى دا تاۋاردىڭ بار-جوعىنا كٶز جەتكٸزبەگەن. ەمييانعا اقشا تٷسكەننەن كەيٸن اككاۋنت بۇعاتتالىپ, ال ەلەكتروندى ەمييان يدەنتيفيكاتسييالانباي قالعان. وسىلايشا زارداپ شەگۋشٸلەر اقشاسىز دا, سىيلىقسىز دا قالىپ وتىر», - دەپ اتاپ ٶتەدٸ نۇر-سۇلتان قالالىق پوليتسييا دەپارتامەنتٸنەن.
تەرگەۋ امالدارى بارىسىندا پوليتسييا قىزمەتكەرٸ الماتى قالاسىندا تۇراتىن رەسەي ازاماتشاسىن ۇستادى. ەيەلدٸڭ ۇيالى تەلەفوندار ساتۋمەن اينالىسۋعا نيەتٸ دە بولماعان. ال اككاۋنتتى الداۋ ماقساتىندا اشقان. زارداپ شەگۋشٸلەردەن تٷسكەن اقشانى قاجەتٸنە جاراتىپ ٷلگەرگەن.
قازٸرگٸ ۋاقىتتا زارداپ شەگۋشٸلەردٸڭ ناقتى سانى انىقتالۋدا. كٷدٸكتٸگە قاتىستى سوتقا دەيٸنگٸ تەرگەۋ امالدارى قولعا الىنعان. جالپى ماتەريالدىق شىعىن 600 مىڭ تەڭگە مٶلشەرٸندە باعالانىپ وتىر.
وسىعان وراي نۇر-سۇلتان قالالىق پوليتسييا دەپارتامەنتٸ ازاماتتارعا مىناداي قاراپايىم ساقتىق شارالارىن ۇستانۋعا كەڭەس بەرەدٸ:
- ۆيدەوبايلانىس ارقىلى تاۋاردىڭ بار ەكەندٸگٸنە كٶز جەتكٸزۋ قاجەت;
- تٶلەمدٸ تاۋاردى قولعا الىپ, ونى تەكسەرگەننەن كەيٸن عانا اۋدارۋ كەرەك.
ينتەرنەت-ساۋداداعى الاياقتىقتىڭ بەلگٸلەرٸ:
- ساتۋشىنىڭ تەلەفونى مەن مەكەنجايى كٶرسەتٸلمەيدٸ;
- ساتۋشىمەن بايلانىستى تەك جازبا ارقىلى جٷرگٸزۋگە ۇسىنادى;
- تاۋار باعاسى ٶزگە ساتۋشىلار ۇسىنعان دەل سونداي زاتتىڭ باعاسىمەن سالىستىرعاندا تىم تٶمەن بولادى.
