Túrkistan oblysynda tergeýshiler pedofil ákeniń kinásin tolyq dáleldedi. Sot ony 20 jylǵa bas bostandyǵynan aiyrdy, dep habarlaidy "Ult aqparat" oblystyq politsiia departamentine silteme jasap.
«Tergeýshilerdiń óndirisinde árqily ister kezdesedi. Keide olardy zerttei otyryp, jábirlenýshilerdiń de, kúdiktilerdiń de taǵdyry qaiǵyly bolatynyn túsinesiń, ásirese ata - analarynyń óz balalary qylmystyń qurbany bolǵan kezde» deidi Túrkistan oblysy PD tergeý basqarmasynyń bastyǵy, politsiia polkovnigi Nurmahan Jalǵasov.
Osy jyldyń basynda Arys APB-ǵa jergilikti turǵyn aryz bergen. Áiel óziniń úlken qyzynyń telefonynda kezdeisoq kúieýiniń jibergen habarlamalaryn taýyp alǵanyn aitty.
Onyń jibergen mátinderiniń mazmuny kúdik týdyrǵan. Sodan soń qyzymen ashyq sóilesip, nátijesinde kúieýiniń óz qyzyn zorlap júrgenin túsingen.
Áieldiń aryzy birden QR QK 120-baby boiynsha tirkeldi. Tergeýshiler tergeýdi bastap ketti.
«Sotqa deiingi tergeý barysynda bul otbasynyń eshqandai esepte turmaityn, qarapaiym januia ekenin anyqtadyq. Otaǵasy Reseide vahtalyq ádispen, al anasy Arys qalasynda jumys isteidi eken. Kópbalaly otbasynda bes bala tárbielenýde. Eń úlken qyzy pedofil ákeniń qurbany bolyp otyr. Biz barlyq tergeý áreketin jan-jaqty zerdelep júrgizdik. Iske qatysty ár nárseni nazardan qaldyrmaýǵa tyrystyq. Oǵan qosa jábirlenýshiniń ákesi de kinásin moiyndamady. Áńgimelesken saiyn istegenin joqqa shyǵaryp, aitqanynan qaitpady. Qyzym barlyǵyn oiynan shyǵaryp otyr dep bizdi adastyrýǵa tyrysty» deidi politsiia polkovnigi.
Sondyqtan barlyq dálelderdi jinaýǵa týra keldi. Sotqa deiingi tergep-tekserýge úsh aidan astam ýaqyt jumsalǵan. Osy ýaqyt ishinde birqatar saraptamalar taǵaiyndaldy.
Qyzdyń ákesiniń kinásin dáleldeý úshin aiǵaqtar jinaldy. Nátijesinde alty tomdyq qylmystyq is qozǵaldy. Ár tom 180 betten turdy. Osylaisha jazda is tolyǵymen aiaqtalyp, aiyptaý aktisimen birge sotqa jiberildi.
«Sot isti qarap, óz úkimin shyǵardy. Óz qyzyn zorlaǵan qatygez áke 20 jylǵa bas bostandyǵynan aiyryldy» dep atap ótti tergeý basqarmasynyń bastyǵy Nurmahan Jalǵasov.
