Túrkistan oblysy Arys qalasyndaǵy áskeri bólim qoimasynda bolǵan jarylysqa bailanysty qala turǵyndary evakýatsiialanyp jatyr. Bul jaiynda QR IIM Tótenshe jaǵdailar komitetiniń resmi ókili Nursultan Nurahmetov aitty, dep habarlaidy QazAqparat tilshisi.
«Arys qalasy ákiminiń ókimimen halyqty Arystan 50 shaqyrym jerdegi Montaitas aýyldyq okrýgine evakýatsiialaý júrgizilip jatyr. Bul úshin 20 avtobýs jumyldyryldy. Sonymen qatar halyqty kóshirý úshin Shymkent qalasynyń ákimdigi 36 avtobýs jiberdi. Shymkent qalasynda 15 evakýatsiialaý beketi quryldy. Qazirgi ýaqytta Arystan 17 bala jetkizilip, Samal-3 shaǵynaýdanyndaǵy Nazarbekov atyndaǵy №87 mektepke ornalastyryldy», - dedi ol.
Onyń atap ótýinshe, oqiǵa ornyna jumyldyrylǵan azamattyq qorǵanys kúshteriniń is-qimylyn úilestirý maqsatynda óńirge QR IIM Tótenshe jaǵdailar komitetiniń tóraǵasy Vladimir Bekker attanyp ketti.
«Órtti sóndirýge Túrkistan oblystyq TJD órt sóndirý bólimshesiniń kúshteri men qural-jabdyqtary, jeke quramnyń 75 mamany men 16 tehnikasy jumyldyryldy. Órt ornyna qosymsha Shymkent qalalyq TJD-nyń 118 mamany men 7 tehnikasy jiberildi», - dedi resmi ókil.
N.Nurahmetovtiń aitýynsha, tótenshe oqiǵa ornynda QR IIM bólimshelerinen jeke quramnyń 463 mamany men 53 tehnikasy, onyń ishinde azamattyq qorǵanys organdarynyń 193 qyzmetkeri men 23 tehnikasy, politsiia bólimsheleriniń 270 qyzmetkeri men 30 tehnikasy jumyldyrylǵan.
«Tótenshe jaǵdaidy joiý jumystary jalǵasyp jatyr. Qazirgi ýaqytta zardap shekkender týraly aqparat joq», - dedi ol.
Al Túrkistan oblysy ákimdiginen málim etkendei, qala turǵyndaryn evakýatsiialaý úshin 3 lager uiymdastyryldy:
1. Aqdala burylysy;
2. 41 razez
3. Sý qorshaýy.
«Barlyq úsh baǵyt boiynsha áskeri kólikter, qosbilikti kamazdar, arnaiy otriadtar qozǵalady. Oqiǵa ornyna jetkennen keiin turǵyndardy aýdan ákimderi qarsy alyp, ornalastyrý lagerlerine bóledi.
Barlyq áleýmettik nysandardy (balalar, aýrýhanalar) politsiia qyzmetkerleri evakýatsiialaityn bolady.
Aita keterligi, Bógen sý qoimasyna eshqandai qaýip joq, tiisti mamandar jaǵdaidy baqylaýǵa alyp otyr.
Sonymen qatar Otyrar men Ordabasy aýdandarynda 100 orynǵa arnalǵan qosymsha gospitaldar tigilip, 30 jedel járdem kóligi jumys isteýde», - delingen ákimdik aqparatynda.
