Qazaqstan boks federatsiiasynyń bapkerlik máseleler jónindegi vitse-prezidenti, memlekettik jattyqtyrýshy Baqtiiar Artaev boksshylardyń Tokio Olimpiadasyndaǵy sátsizdikteri úshin keshirim surady, dep habarlaidy QazAqparat.
«Árine, Tokio Olimpiadasynda óte sátsiz bolǵan kórsetkishimiz úshin keshirim suraimyz. Aldaǵy ýaqytta saraptama, júieli jumys jasalyp, kelesi Olimpiada oiyndarynda ózimizdiń burynǵy kórsetkishterimizge qaita oralyp, joǵary nátije kórsetemiz dep sendirgim keledi. Qoldaýlaryńyzǵa kóp rahmet. Ári qarai júieli jumys jasap, sporttyq nátijelerimizdi kóteremiz. Eshqandai suraq joq, rahmet aitqym keledi», - dedi Baqtiiar Artaev Qazaqstan Ulttyq Olimpiada komiteti Bas assambleiasynyń otyrysynda.
Aita keteiik, atalmysh sharada Premer-Ministrdiń orynbasary Eraly Toǵjanov Mádeniet jáne sport ministrligine sport bapkerleriniń ailyǵyn kóterý týraly tapsyrma berdi.
«Ulttyq olimpiada komiteti Mádeniet jáne sport ministrligimen, Bilim jáne ǵylym ministrligimen birlesip, joǵary oqý oryndarynda jańa bilim baǵdarlamalaryn daiyndaýǵa atsalysýy kerek. Sondai-aq, ministrlikke bapkerlerdi qoldaý, onyń ishinde eńbekaqysyn kóterý boiynsha usynys daiyndaý kerek. Tórtinshiden, aldaǵy Beijiń qalasynda ótetin qysqy Olimpiada oiyndarynda sportshylarymyzdyń tabysty óner kórsetýin qamtamasyz etý qajet. Bul máseleni jýyqta Úkimette talqylaǵanbyz. Federatsiia basshylarymen bul jóninde jeke kezdesý ótkizemiz», - dedi vitse-premer.
