Senator Erik Sultanov Úkimet basshysy Álihan Smaiylovtyń atyna depýtattyq saýal joldady. Ol Qazaqstannyń arnaiy ekonomikalyq aimaqtaryn damytýdyń problemalaryn qozǵady, dep habarlaidy QazAqparat.
Depýtat investitsiia men jańa tehnologiia tartýǵa arnalǵan tiimdi alańdardyń biri – arnaiy ekonomikalyq aimaqtar bolýy tiis ekenin atap ótti. Alaida júrgizilgen memlekettik aýdit qorytyndylary boiynsha AEA-nyń tiimdiligi tómen deńgeide qalyp otyr.
Senatordyń paiymdaýynsha, aýqymdy biýdjettik investitsiia aiasynda sheteldik investitsiia úlesiniń tómendigi jańa tehnologiialardy engizýge jáne eksporttyq taýar óndirisin damytýǵa tikelei áser etedi. AEA aýmaǵynda shyǵarylatyn ónimniń jalpy kólemindegi eksport úlesi orta eseppen 3,5%-dan aspaidy. Bul rette 2017-2020 jyldardaǵy eksport quramynda ónimniń tómen bólinistegi úlesi basym bolyp otyr.
«Osynyń bári búginde AEA-nyń basym bóliginde qosylǵan quny joǵary ozyq tehnologiialyq óndiristi damytý jáne jergilikti ónimge ainaldyrý jóninde naqty maqsat qoiylmaýynyń kórsetkishi bolyp otyr. Odan basqa, AEA-ny infraqurylymmen qamtamasyz etý máselesi erekshe nazar aýdarýdy talap etedi. 13 AEA-nyń tek 3-i qajetti kommýnikatsiiamen tolyq qamtamasyz etilgen. Mundai keleńsiz jaǵdai AEA-nyń jalpy aýmaǵynyń shamamen 60%-y bos qalýyna alyp keldi, sonyń saldarynan jańa investorlardy tartýdy jáne áleýetti serpindi jobalar ázirleýdi tejep otyr», - dedi senator.
Depýtat E. Sultanov osyǵan bailanysty AEA aýmaǵyndaǵy infraqurylym nysandarynyń qurylysyn aiaqtaýdyń egjei-tegjeili josparyn ázirleý, otandyq kásipkerlikke, onyń ishinde startap jobalarǵa belsendi qatysý jáne kómek kórsetý, investitsiia kólemine, salyqtar men shyǵarylatyn ónimge bailanysty beriletin jeńildikterdiń merzimderine saralaý júiesin engizý qajettigine nazar aýdardy.
