Erlan Qarin QazTRK'ǵa basshy bolyp kelgende qýanyp, kóbińiz quttyqtap, usynystaryńyzdy jazdyńyzdar. Endi tynyshtala bergen kezde men de oiymdy jazýdy jón kórdim. Qansha degenmen, kún saiyn keminde 2-3 saǵat "Balapan" arnasy qosylyp turatyn úidiń iesimin ǵoi.
Áńgime "Balapan" týraly...
"Balapanda" birnárseni qaitalai beredi degen túsinik bar. Bul bir baǵdarlamalar tizbegin kúnine úsh ret qaitalaǵannan týǵan pikir emes. Bul bir mýltfilmdi bes jyl qaitalaǵannan týǵan pikir. Odan da buryn bir aida bir mýltfilmniń bir seriasyn alty márte, ár kúni úsh retten, on segiz ret kórsetkennen týǵan pikir. Odan da soraqysy, bir mýltfilmniń búgin segizinshi seriasy kórsetilse, erteń on úshinshi, arǵy kúni tórtinshi seriasy kórsetile beredi. Bul qubylystyń syryn túsiný qiyn endi...
"Balapanda" úzilmei kele jatqan bir baǵdarlama bar. "Ádemi-ai" degen. Qarshadai qyzdar sándenip kiinip, ózderinshe oiqastap ári-beri júredi. Bul ýaqytyly túsirilip, jańadan kórsetilip otyratyn "erke" baǵdarlama. Bir ǵana suraq: osydan ne paida al?
"Sissi" degen bir mýltserialdy kórip otyrsam, bir boijetkendi bir jas jigit qushaqtap, ikemdep jatyr endi. Sóitse, bir qyz júgirip kelip "Toqta, sen ony súimeisiń ǵoi" deidi. (15.02.2017 jyldyń tańynda kórsetilgen seriasynan).
"Balapannyń" tilin qolǵa almai bolmaidy. "Bolady ma?", "Kóredi me?" degen sózderdiń dendep enýine úles qosyp jatyr. Qaita aýyrsynǵanda "meniń qolym" demei, "qolym-ai" degendei, keibir jaqsy aýdarma úlgileri kezdesetin bolyp júr keiingi kezde. Jattyǵý jasaityn qyz da "bes!", "altY", "jetI" dep, ekpinderin durys qoiyp sanaidy. Buryn bireýi "Alt", "jEt" dep, ekpindi birinshi býynǵa túsirip turýshy edi. Keiipkerler bir qýanysh bolsa "Iá!" dep aiqailaityndary jaman endi. Jalpy, aita berse, bul uzaq áńgime. Shama kelse, bolashaqta balalar jazýshylary, qazaq tilin shyn biletin mamandar "Balapannyń" redaktsiiasynda otyrsa eken dep tileimin.
(Kóp dúnie aýstorsinge berilip, ony burynǵy ýchastkovyi, elektrikter (búginde jekemenshik stýdiialary bar, eń bastysy joǵary jaqtaǵylardyń bajasy, baldyzy, klasstasy degendei) alyp ap, qurtqan da shyǵar, kim biledi).
"Shytyrmandy" júrgizetin Talǵar degen bala-jigitke dán rizamyn. Qazaqy jigit naǵyz. Maiyspaidy, ótirik kúlmeidi. Sol sekildi, "On saýsaq" bolsa kerek, bir baǵdarlamany júrgizetin tolyqtaý kelgen balany da táýir kóremin. Jigittiń jigit siiaqty bolǵany durys qoi. Balalar solarǵa qarap, elikteitin shyǵar, biz bárin baiqai bermeimiz. Al endi bala kórgen mýltfilmin, teledidardy sóndirgen soń da uzaq ýaqyt oilap júretini ap-anyq nárse. Qiialy men tanymynyń damýyna, mineziniń qalyptasýyna tikelei áser etedi.
"Balapan" - endi on-on bes jyldan keiin mektep bitirip, úlken ómirge aralasatyn býyndy tárbielep jatqan arna. Dál búginnen bastap, osy arna durystala bastasa, investitsiianyń kókesi sol bolar edi. On-on bes jyl degen tez ótetin ýaqyt. (On jyl buryn 2007 jyl edi, odan beri sonshalyqty kóp ýaqyt ótti me?)
Durys adam - durys memlekettiń negizgi alǵysharty ekeni belgili... Kóp aitylatyn bir sózdi aita salaiyn:
Bir jyl ómirińdi oilasań, egin sal; on jyl ómirińdi oilasań, aǵash ek; júz jyldan keiingi ómirińdi oilasań, urpaǵyńa durys tárbie ber.
Jańa basshynyń isine bereke tileimin.
Qurmetpen oiyn jazǵan adamdy "shyn janashyry" dep bilgei!..
Arman Álmenbettiń feisbýktaǵy jazbasynan
