Qoja Ahmet Iasaýi kesenesi aýmaǵynan tarihi nysandar tabyldy. Arhelogtar bul álemdik sensatsiialyq jańalyq ekenin málim etti, dep habarlaidy "Ult aqparat" «Áziret Sultan» memlekettik tarihi-mádeni qoryq-mýzeiine silteme jasap.
«Eski Túrkistan qalasynyń kóne shahristanynan XVIII-XIX ǵasyrlarǵa tán kerýen sarai, monsha, keramikalyq tseh, mektep oryndary jáne Jeti ata qaqpasyna deiingi ortaǵasyrlyq magistraldy kóshe boiynan handardyń namaz oqityn jeke bólmesi men áskeri munaralar, qonaq qabyldaityn bólmeler tabyldy», delingen habarlamada.
Tákiia qaqpasynyń janynan tabylǵan úlken kerýen saraida - qujattar men baǵaly zattar saqtaityn arnaiy qýystar, qabyldaý bólmesi, aýlasy men qoimalary, kerýenshiler turatyn bólmeleri, namazhanasy, «múrichá» dep atalatyn bir bólmeli monshasy bar.
Sonymen qatar zertteýshiler kóne Túrkistanda alǵashqy mektepti tapty. Mektep aýlasynyń ekige bólinýi bir jaǵynda ul, ekinshi jaǵynda qyz balalar oqyǵanyn kórsetedi. Munda syrttan kelgen balalardyń jatyp oqýyna arnalǵan bólmeleri bar.
Sondai aq, Qazaqstanda alǵash ret qysh ydys jasaityn tseh tabyldy.
«Úlken kólemdegi qysh (keramika) buiymdar shyǵaratyn orynnyń anyqtalýy sensatsiialyq oqiǵa deýge bolady. Iasaýi kesenesi aýmaǵynda ornalasqan qysh buiymdaryn daiyndaityn keń aýqymdy keshende saz ileitin, ydys-aiaq jasaityn, keptiretin, kúidiretin, saqtaityn oryndardyń barlyǵy qarastyrylǵan», delingen habarlamada.
Shahristannan tabylǵan kishigirim monsha qurylysy birneshe bólmelerden turady. Sý rezervýary siiaqty – sardoba da saqtalǵan. Ereksheligi qurylystan bólek qyzmetkerler úshin arnaiy bólmeleri bar. Emdik qasieti bar tunbalar daiyndaityn vanna siiaqty ydys ta saqtalǵan.
Arheologiialyq qazba jumystary QR Mádeniet jáne sport ministrliginiń bastamasymen «Áziret Sultan» memlekettik tarihi-mádeni qoryq-mýzeiiniń damý tujyrymdamasyna sáikes júzege asyrylýda. Zertteý jumystarymen Qazaq ǵylymi-zertteý mádeniet institýty men «Áziret Sultan» memlekettik tarihi-mádeni qoryq-mýzeiiniń tarihshy, ǵalym, arheolog mamandary ainalysyp keledi.
