Tentek sýǵa sylqiia toiyp alǵan Almaty oblysynyń turǵyny toǵyz ai buryn óziniń aǵasyn óltirgenin moiyndaǵan. Qaskói jasaǵan qylmysy týraly tártip saqshylaryna ózi telefon soǵyp, aityp beripti.
Jańajyldyq merekelerden soń Úshtóbe aýylynyń turǵyny tártip saqshylaryna habarlasyp, osydan on ai buryn ashýmen 47 jastaǵy múgedek aǵasyn óltirip alǵanyn aitqan. Ol týysynyń keýde tusy men moinyna birneshe jerden pyshaq urypty. Jarymjan kisi alǵan jaraqatynan sol jerde jan tapsyrǵan. Al kúdikti máiitti úidiń jertólesine kómip tastapty.
Sergei esimdi kúdikti ákesi jáne marqum týysy - úsheýi birge turyp jatqan. Úsh boidaq ishimdikke tym jaqyn bolǵan. Bular kezekti bir dýmandy otyrys bolǵan kúnniń erteńine bas jazyp jatqanda janjal shyqqan. Arty qaiǵyly aiaqtalyp otyr. Kórshilerdiń aitýynsha, qaza tapqan kisi óte jýas ári eshkimge ziiany joq azamat bolǵan. Onyń kenetten kózden tasa bolýy aýyldastarynyń da kúdigin týdyrypty. Biraq qaskóilik jasaǵan azamat attas aǵasy Almatydaǵy aǵaiyndarǵa ketti dep eldi aldap kelgen.
Antonina Goreeva, kúdiktiniń kórshisi:
- Kúnde júrgen adam kenetten joq bolyp, sol kúii oralmady. Sergeiden surasaq, álgindei jaýap aitady. Mundai qylmys jasaǵandardy Qudai jazasyz qaldyrmaidy. Onyń moiyndaǵanyna shúkir deý kerek. Eger múldem aitpasa qaiter edi? Bul is sol kúii jabýly qalar edi ǵoi.
Al, politseiler Sergeidiń ózi habarlasyp, qylmysyn moiyndaǵanyna ań-tań. Kúdikti telefon soqqanda ýdai mas bolypty. Ári eles jaiynda jii-jii qaitalai bergen.
Damir Amanjolov, Qaratal aýdandyq IIB bastyǵynyń orynbasary:
- Onyń 102-ge habarlasyp, adam óltirdim degenine eshkim senbedi. Biraq bizdiń qyzmetkerler barǵanda ol birden jertólege kómilgen máiitti kórsetken. 10 aida marqumnyń denesiniń tek súiegi ǵana qalypty. Al, araqqa toiyp alǵan ózi marqumnyń jii túsine kirip, maza bermeitinin aitqan.
Qazir marqumnyń denesi saraptamaǵa jiberilgen. Al aǵasyn óltirgen Sergeidiń ústinen adam óltirý baby boiynsha is qozǵaldy. Endi ol 7 jyldan 15 jylǵa deiin bas bostandyǵynan aiyrylýy múmkin. Biraq ózi kelip kinásin moiyndaýyna bailanysty jazasynyń jeńildeýi de yqtimal.
