Qazaqstanda aqyly joldarda jalǵan nemese jasyrylǵan memlekettik nómirmen júretin júrgizýshilerdiń sany azaimai tur. Jyl basynan beri osyndai 2 myńǵa jýyq zańbuzýshylyq faktisi anyqtalǵan, dep habarlaidy ult.kz.
«QazAvtoJol» málimetinshe, keibir júrgizýshiler aqyly joldyń tóleminen jaltarý nemese jol qozǵalysy erejelerin buzǵanyn jasyrý úshin túrli ailaǵa barady.
Máselen, júk kólikteriniń keibirine memlekettik tirkeý nómirin jasyratyn arnaiy qurylǵylar ornatylǵan. Batyrma basylǵan sátte nómir kórinbei qalady, nátijesinde jol boiyndaǵy kameralar ony tirkei almaidy.
Mundai zańbuzýshylyqtar boiynsha barlyq aqparat quzyrly organdarǵa joldanady. Mamandardyń aitýynsha, jalǵan nómir paidalanǵan nemese memlekettik tirkeý belgisin ádeii jasyrǵan júrgizýshiler zań aldynda jaýap beredi.
Qoldanystaǵy zańnamaǵa sáikes, mundai áreketter úshin ákimshilik jaza qoldanylyp, kei jaǵdaida kólik quralyn basqarý quqyǵynan aiyrýǵa deiingi jaýapkershilik qarastyrylǵan.
