قازاقستاندا اقىلى جولداردا جالعان نەمەسە جاسىرىلعان مەملەكەتتٸك نٶمٸرمەن جٷرەتٸن جٷرگٸزۋشٸلەردٸڭ سانى ازايماي تۇر. جىل باسىنان بەرٸ وسىنداي 2 مىڭعا جۋىق زاڭبۇزۋشىلىق فاكتٸسٸ انىقتالعان, دەپ حابارلايدى ult.kz.
«قازاۆتوجول» مەلٸمەتٸنشە, كەيبٸر جٷرگٸزۋشٸلەر اقىلى جولدىڭ تٶلەمٸنەن جالتارۋ نەمەسە جول قوزعالىسى ەرەجەلەرٸن بۇزعانىن جاسىرۋ ٷشٸن تٷرلٸ ايلاعا بارادى.
مەسەلەن, جٷك كٶلٸكتەرٸنٸڭ كەيبٸرٸنە مەملەكەتتٸك تٸركەۋ نٶمٸرٸن جاسىراتىن ارنايى قۇرىلعىلار ورناتىلعان. باتىرما باسىلعان سەتتە نٶمٸر كٶرٸنبەي قالادى, نەتيجەسٸندە جول بويىنداعى كامەرالار ونى تٸركەي المايدى.
مۇنداي زاڭبۇزۋشىلىقتار بويىنشا بارلىق اقپارات قۇزىرلى ورگاندارعا جولدانادى. مامانداردىڭ ايتۋىنشا, جالعان نٶمٸر پايدالانعان نەمەسە مەملەكەتتٸك تٸركەۋ بەلگٸسٸن ەدەيٸ جاسىرعان جٷرگٸزۋشٸلەر زاڭ الدىندا جاۋاپ بەرەدٸ.
قولدانىستاعى زاڭناماعا سەيكەس, مۇنداي ەرەكەتتەر ٷشٸن ەكٸمشٸلٸك جازا قولدانىلىپ, كەي جاعدايدا كٶلٸك قۇرالىن باسقارۋ قۇقىعىنان ايىرۋعا دەيٸنگٸ جاۋاپكەرشٸلٸك قاراستىرىلعان.
