Aqtaýlyq bloger Azamat Sársenbaev Kaspii teńizindegi áskeri oqý-jattyǵý kezinde qaza bolǵan 14 áskeri qyzmetshiniń biri Almas Kóbenovtiń úiine baryp, otbasyna kóńil aitty. Bul týraly ol áleýmettik jelidegi paraqshasynda jazdy, dep habarlaidy ult.kz.
Blogerdiń aitýynsha, Almas Kóbenov otbasyndaǵy bes balanyń kenjesi bolǵan. Onyń eki aǵasy da ásker qatarynda bolyp, áskeri boryshyn ótep kelgen.
Sársenbaev otbasynyń qazir aýyr jaǵdaidy bastan ótkerip otyrǵanyn atap ótti. Onyń sózinshe, Almastyń anasy qaterli isikke bailanysty em qabyldap jatyr.
«Anasy qaterli isikpen aýyrady, ekinshi kezeńinde, qazir himiia sáýlesin qabyldap jatyr. Ókinishke qarai, uly qaza bolǵan kúni onyń em qabyldaýy kerek bolǵan. Alaida qaiǵyly jaǵdaiǵa bailanysty emin úi jaǵdaiynda alýǵa májbúr bolǵan», – dep jazdy bloger.
Onyń málimetinshe, otbasy qarapaiym jaǵdaida ómir súrip otyr. Bloger úidegi aýyr ahýaldy da atap ótken.
2006 jyly týǵan Almas Kóbenov Qaraqalpaqstanda dúniege kelgen. Keiin Mańǵystaý oblysy Munaily aýdany Baiandy aýylynda turǵan. Ol 29011 áskeri bóliminde matros, granataatqysh bolyp qyzmet atqarǵan.
Aita keteiik, Mańǵystaýda qaza tapqan áskeri qyzmetshiler memlekettik nagradalarmen marapattaldy.
