Aqtaý qalasynda tórt balanyń anasy kúieýiniń soqqyǵa jyǵyp, qolyn syndyrǵanyn aityp, kómek suraǵan. Bul týraly advokat Lázzat Raqysheva áleýmettik jelidegi paraqshasynda jazdy, dep habarlaidy ult.kz.
Áieldiń aitýynsha, oqiǵa 8 qyrkúiek kúni bolǵan. Onyń sózinshe, kúieýi qatty mas kúide úige kelgen. Sol kúni enesi áieldi kúieýine jamandaǵan. Artynsha er adam áielin tunshyqtyryp, qylǵyndyrǵan.
«Óletin shyǵarmyn dep oiladym. Qolyn tistep, qashyp shyqtym. Biraq artymnan kelip, asúide uryp, tepkiledi», – dep baiandaǵan áiel.
Soqqy saldarynan áieldiń qoly synǵan. Qazir ol aýrýhanada em alyp jatyr. Áiel politsiiaǵa aryz jazyp, kúieýinen ajyrasatynyn jáne aliment óndirýge ótinish beretinin aitqan. Onyń tórt balasy bar. Balalary ázirge anasynyń qaraýynda.
Advokat Lázzat Raqyshevanyń málimetinshe, tórt balanyń anasy 8 qyrkúiekte kómek surap, ortalyqqa habarlasqan. Oǵan zańgerlik keńes berilip, Aqtaý qalasynyń politsiia qyzmetkerlerine habarlanǵan. Politsiia áieldiń aryzyn qabyldap, sot-meditsinalyq saraptama taǵaiyndaǵan.
Advokat bul is boiynsha áieldiń densaýlyǵyna keltirilgen ziianǵa quqyqtyq baǵa berilýi keregin atap ótti. Onyń jazbasynda jaǵdai QR Qylmystyq kodeksiniń 107-baby 2-bóligi 3-tarmaǵyna sáikes qaralýy múmkin ekeni aitylǵan.
