Foto: Pexels.com
Qazaqstannyń eńbek naryǵyn damytý jáne kadrlyq áleýetin nyǵaitý taqyrybyndaǵy Úkimet saǵatynda Áleýmettik-mádeni damý komitetiniń tóraǵasy Ashat Aimaǵambetov eńbek naryǵy týraly sóz qozǵaǵanda migranttardyń faktory eskerilmeitinin aitty. Bul týraly Ult.kz habarlaidy.
Májilis depýtatynyń aitýynsha, relokanttardy aitpaǵannyń ózinde, migranttardyń eńbek naryǵyndaǵy úlesi týraly naqty málimetter joq.
"Buǵan qosa biz basqa elderge jumysqa shyǵatyn azamattarymyzdyń quqyqtarymen jetkilikti dengeide ainalyspaimyz. Alysqa barmai-aq, Eýraziialyq ekonomikalyq odaqqa kiretin elderdi alaiyq. Ártúrli málimetter boiynsha - osy odaqta shamamen 200 myń qazaqstandyq jumys isteidi, bul is júzinde bútin bir salamen teń.
Kóptegen otandasymyz Ońtústik Koreiada eńbek etýde. Ol azdai sońǵy kezderi Angliiada «qulpynai terip júrgen» azamattar kóbeiip ketken. Olardyń sany qansha, jáne nege bul faktorlar bizdiń jumyspen qamtý statistikasynda jáne saiasatynda eskerilmeidi, biz bilmeimiz. Bizdiń eldiń azamattary jumys isteitin barlyq memleketpen, tipti ol memlekette 1 ǵana otandasymyz jumys isteitin bolsa da, olardyń quqyqtaryn qorǵaý boiynsha kelisimder jasaý qajet. Bul baǵyt boiynsha da naqty saiasat pen sharalar áli jetkiliksiz", - dep atap ótti A.Aimaǵambetov.
Ol jyldam tehnologiialyq progress eńbek salasynda jańa syn-qaterler ákelgenin eske saldy.
"Jańa mamandyqtar paida bolyp, keibir "zeinetker mamandyqtar" jai ǵana "joiylýda". Boljamdarǵa sáikes, Qazaqstandaǵy jumys oryndarynyń 52% avtomattandyrýdyń táýekeline ushyraidy. Aldaǵy 15-20 jylda jumys oryndarynyń 14% joiylýy múmkin, al taǵy 32% qatty ózgeredi.
Avtomattandyrý jáne jasandy intellekttiń damýy eńbek naryǵynda aitarlyqtai ózgeristerge ákeledi. Bir jaǵynan, osyǵan bailanysty úlken jumyssyzdyq paida bolsa, al ekinshi jaǵynan, kadr tapshylyǵa bolady deidi ekspertter. Iaǵni jańa jumys oryndarynda jasandy intellekt júielerimen jumys istei alatyn kadrlardyń jetispeýshiligi osyndai kadr tapshylyǵyna alyp keledi. Osyǵan orai jumys kúshiniń ikemdiligin qamtamasyz etip, jasandy intellekt júielerimen jumys isteý boiynsha qajetti quzyretterdi berý mańyzdy bolyp otyr. Alaida, osy máseleler boiynsha áreket etý strategiiasy áli de aiqyn emes", - deidi depýtat.
Aita keteiik, buǵan deiin Ashat Aimaǵambetov jumyspen qamtý baǵdarlamalaryn synaǵan bolatyn.
