Senator Andrei Lýkin lombardtar men mikroqarjy uiymdarynyń jumysyna qatysty olqylyqtarǵa jáne qazirgi normalardyń durys oryndalmaýyna bailanysty qazaqstandyqtar zardap shegýge májbúr bolyp otyrǵanyn aitty, dep habarlaidy "Ult aqparat".
Osyǵan orai depýtat Qarjy naryǵyn retteý jáne damytý agenttigine saýal joldap, qazirgi tańda lombardtar óz jumysyn bastaǵany týraly memlekettik organdarǵa eskertpeýge quqyly ekenin atap ótti. Bul olardyń qyzmeti Agenttik tarapynan baqylanyp, rettelmeidi degen sóz. Osyndai lombardtardy tekserý múmkindiginiń joqtyǵyna bailanysty olarǵa qatysty qandaida bir ákimshilik shara qoldaný múmkin emes.
Sonymen qatar senator mundai qarjy uiymdarynyń qyzmetine baqylaý júrgizýge mindetti keibir memlekettik organdar esh is-áreket jasamai otyrǵanyn da tilge tiek etti.
Sondyqtan Andrei Lýkin mikroqarjy uiymdarynyń qyzmetin baqylaý úshin biryńǵai aqparattyq júie qalyptastyrýdyń mańyzy zor dep esepteidi. Sondai-aq, kepilge qoiylǵan múlikti onyń iesine avtomatty túrde eskerte otyryp, jariia saýda ótkizetin platforma qajet. Tirkelmegen barlyq lombard zańdy túrde qaitadan qurylýǵa nemese múldem jabylýǵa tiis. Odan bólek, depýtattyq saýalda zaim bergen kezdegi komissiia kólemin reglamentteýge jáne qaýipsizdik pen tehnikalyq jabdyqtaýǵa qoiylatyn talaptarǵa qatysty zańnamalardy jetildirýdiń mańyzdy ekeni aityldy.
