Nur-Sultanda «COVID-19 kezeńinde memlekettik qyzmet salasyndaǵy adam resýrstaryn basqarý: úzdik tájiribeler men sheshimder» taqyrybynda halyqaralyq onlain konferentsiia bolyp ótti, dep habarlaidy "Ult aqparat".
QR Memlekettik qyzmet isteri agenttigi, Astana memlekettik qyzmet haby jáne Koreia Respýblikasynyń Personaldy basqarý jónindegi ministrligi úiymdastyrǵan onlain konferentsiia barysynda pandemiia kezinde týyndaǵan memlekettik qyzmettegi adam resýrstaryn basqarý salasyndaǵy problemalar jáne olardy sheshý úshin qabyldanǵan sharalar talqylandy.
Alǵy sóz sóilegen QR Memlekettik qyzmet isteri agenttiginiń basshysy Anar Jaiylǵanova pandemiia kezindegi memlekettik apparattyń jumysyna toqtalyp ótti.
«COVID-19 pandemiiasy - búkil álem úkimetteriniń aldynda turǵan eń mańyzdy máselelerdiń biri. Biraq ol basqarý reformalaryn júzege asyrýǵa, memlekettik apparatty keń kólemde tsifrlandyrýǵa jáne memlekettik qyzmettiń adam resýrstaryn basqarý júiesin qaita qaraýǵa yqpal etetin memlekettik apparat jumysynyń qaitymsyz ózgerýiniń katalizatoryna ainaldy», - dedi ol.
A.Jaiylǵanovanyń aitýynsha, Memleket basshysynyń tapsyrmasyn oryndaý maqsatynda osy qiyn kezeńde memlekettik apparattyń úzdiksiz jumysyn qamtamasyz etý boiynsha aýqymdy jumys júrgizildi.
«Qazirgi ýaqytta turǵyndardyń HQKO men memlekettik qurylymdarǵa barmai-aq, qajetti memlekettik qyzmet túrlerin alýy úshin memlekettik qyzmetkerler barynsha úilesimdi jumys isteýleri kerek. Jalpy, memlekettik apparat pandemiiadan týyndaǵan daǵdarys kezinde qaterler men kedergilerdi jedel sheshý qabiletin jáne tiimdiligin dáleldedi dep esepteimin», - dedi MQIA tóraǵasy.
Memlekettik qyzmet salasyndaǵy óńirlik habtyń basqarýshy komitetiniń tóraǵasy Álihan Báimenov pandemiia kezinde tiimdi basqarýdy júzege asyrý úshin qoǵamdyq senimniń mańyzy zor ekenin atap ótti.
«Álemniń barlyq uiymdarynda adam resýrstaryn basqarýǵa kóp kóńil bólinýde. Biraq uiymdarǵa degen senimdi nyǵaitý mańyzdy aspekt bolyp tabylady. Pandemiia kezinde jasalǵan jumysty taldaý nátijesinde bilik tarmaqtary men qurylymdary arasynda resýrstardy, mindetter men ókilettikterdi qaita bólý júzege asyrylatyny anyq. Bul úderiste kadr qyzmetterine basymdyq beriletini sózsiz», – dedi Á.Báimenov.
Koreia Respýblikasynyń Personaldy basqarý jónindegi ministri So Chong Hvan memlekettik qyzmette adam resýrstaryn basqarý salasynda osy elde qabyldanǵan sharalar jaily baiandady.
Sondai-aq, onlain konferentsiia barysynda Ýkraina, Ózbekstan, EYDU uiymdarynyń sarapshylary sóz sóiledi. Onlain konferentsiiaǵa qatysýshylar memlekettik qyzmettegi adam resýrstaryn basqarý salasyndaǵy ózekti máselelerdi talqylap, tájiribe almasty.
.jpeg)