Jambyl oblysyndaǵy "Andas batyr" shekara bóliminde áskeri boryshyn ótep júrgen sarbazdy týystary bir aidan astam ýaqyt boiy izdestirip jatyr, - dep habarlaidy Tengrinews.kz.
Ulyqbek Berdishovtiń anasy Orynkúl Merekovanyń aitýynsha, ulynyń joǵalǵanyna bir ai bes kún bolypty. Mine, osy ýaqyttan beri týystarymen birge zastava mańyndaǵy Andas batyr aýylynan úi jaldap turýǵa májbúr. Ol - Qyzylorda oblysy Qazaly aýdanynyń turǵyny.
"Balamnyń joǵalǵanyn 2 naýryzda bildim. Starshina telefon soǵyp, ózin Janbolat dep tanystyrdy. Aldymen Ulyqbek habarlasty ma dep surady. Men iá, eki kún buryn sóilestik dep jaýap berdim. Keiin telefon tutqasyn qoia saldy. Sosyn keshke taǵy habarlasyp, ulym joǵalyp ketkenin aitty. 12 saǵat boiy jańalyq kúttik, biraq Ulyqbek kelmedi. Kúieýim, qart ákem jáne taǵy bir týysym taksige minip, sol jaqqa ketti. Men de úide otyryp, kúte almadym. Úide kámeletke tolmaǵan tórt bala qaldy", - deidi Ulyqbektiń anasy.
Áieldiń aitýynsha, uly áskeri boryshyn óteýge kelgen bólimde ol qalai joǵalyp ketkenin eshkim bilmeidi.
"Sharasyzdyqtan qumalaqshyǵa da bardyq, Ulyqbek tiri deidi, "biraq bireý kúshpen ustap otyr" dedi. Áskerilerdiń, politsiianyń eshqaisy Ulyqbekti izdep jatqan joq, áiteýir men izdep jatqandaryn kórgenim joq. Kúni keshe ǵana baiqadym, áskeri kiim kigen adamdar onyń sýretterin ilip qoia bastady. Sonymen bitti. Osy másele boiynsha Jambyl oblysynyń ákimine barmaq oiym bar. Nátije bolmasa, Nur-Sultanǵa Qazaqstan Respýblikasynyń Prezidenti Qasym-Jomart Toqaevtyń qabyldaýyna baramyn", - dedi Orynkúl Merekova.
Sondai-aq, áielge bólim komandiri Ulyqbekti izdeý jumystary toqtatylǵanyn aitqan.
"Bizge jarǵy boiynsha joǵalǵan adamdy 30 kúnnen aspaityn ýaqyt izdeitinin aitty. Ulyma qatysty qylmystyq is qozǵaldy. Men eshqaida ketpeimin. Ana júregim, balam jaqyn jerde ekenin aitty, men ony izdeimin", - dedi ol kózine jas alyp.
Jýrnalist zastava basshylyǵyna habarlasyp kórdi, biraq telefondy kótermedi.
Eske salaiyq, Ulyqbek Berdishov 2021 jyldyń qyrkúieginde áskerge shaqyrylyp, 2022 jyldyń 2 naýryzynda habarsyz ketkeni habarlanǵan. Erekshelikteri: aryq deneli, boiy 167 santimetr, shashy qysqa qara.
