Among Us oiynynan zańsyz kontent tabylǵan joq, dep habarlaidy "Ult aqparat" Stopfake resýrsyna silteme jasap.
Qazirgi ýaqytta WhatsApp jáne Telegram messendjerlerinde qazaqstandyq paidalanýshylar PC, Android jáne iOS mobildi platformalarynda qoljetimdi Among Us tanymal kompiýterlik oiynynyń qaýipti ekendigi týraly dybystyq habarlamalar taratýda.
Dybystyq habarlama avtory ata-analardan balasynyń telefonynda osy oiynnyń bar-joǵyn tekserýdi suraidy. Olar oiynda «qorqynyshty tapsyrmalar beriledi» jáne «óz-ózine qol salýǵa ákeledi» dep málimdeidi.
Buǵan dálel retinde «34 mektepte oryn alǵan oqiǵany» keltiredi. Dál osy Among Us oiynnyń saldarynan oqýshy qyz asylyp qalǵan. «Oǵan tapsyrma berilgen».
Osyndai dybystyq habarlama mazmunyna qarai avtoryn anyqtaý múmkin emes. «Jazataiym oqiǵa» qai qalada jáne qai elde bolǵany da belgisiz.
Naqtyraq aitqanda, biz bul dybystyq habarlamany reseilik oiynshylardyń biriniń YouTube arnasynan taptyq. Soǵan qaraǵanda qarashanyń sońynda Reseide jazylyp, taratyla bastaǵan deýge bolady. Demek, habarlamada aitylǵan qaiǵyly oqiǵanyń (eger ol oryn alǵan bolsa) Qazaqstanǵa eshqandai qatysy joq.
Degenmen, bul dybystyq habarlamalar QR BǴM Balalardyń quqyqtaryn qorǵaý komitetine resmi saýal joldaýymyzǵa túrtki boldy. QR Aqparat jáne qoǵamdyq damý ministrligi.
AQDM óz kezeginde, osy saýaldyń sheńberinde «Among Us» oiynynda zańsyz kontenttiń bar-joǵyn anyqtaý maqsatynda monitoring júrgizdi.
«Oiyn telefonǵa Playmarket jáne Appstore arqyly júkteledi. Oiyn barysynda habarlamalardy aǵymdaǵy oiynnyń chatyna jiberý arqyly nemese dybystyq habarlamalar almasýǵa múmkindik beretin discord qosymshasyn telefonǵa júkteý arqyly sóilesýge bolady. Paidalanýshylar arasyndaǵy barlyq hat-habarlar oiynnyń ózinde júrgiziledi, ony basqa qatysýshylar kóre almaidy. Bul rette oiynǵa qatysýshylar arasyndaǵy áńgimeniń ne jaily ekendigin anyqtaý múmkin emes. Osyǵan bailanysty ministrlik qandai da bir zańsyz kontenttiń, onyń ishinde oiynǵa qatysýshylardy sýitsidke itermeleý belgileriniń bolýy týraly qorytyndy jasai almaidy. Bul rette Ministrlik Qazaqstan Respýblikasynyń zańnamasyna sáikes, árbir ata-ana óz balasy úshin jeke jaýapty ekenin jáne óz balasynyń aqparattyq keńistikte ne istep jatqanyn, kimmen hat almasatynyn jáne qai taqyrypta jazatynyn ózi tekserýi tiis ekenin atap ótti» delingen Aqparat jáne qoǵamdyq damý ministrliginiń resmi habarlamasynda.
Among Us oiynyna keletin bolsaq, ol 2018 jyldyń maýsym aiynda shyqqan. InnerSloth stýdiiasy ázirlegen oiyn eki jyl boiy qarapaiym oiyndar qatarynda bolǵan. Biraq biyl kúzde oǵan Twitch-te 2,8 million jazylýshysy bar áigili strimmer Sodapoppin nazar aýdardy. Osydan keiin Among Us búkil álemge tanymal boldy. Qyrkúiek aiynda ol Steam satý kestesinde birinshi orynǵa shyqty.
Among Us – komandalyq oiyn, oǵan bir ýaqytta 4-10 adam qatysady. Ol saýyq keshterinde nemese dostar arasynda jii oinalatyn bárine belgili «Mafiiaǵa» uqsaidy. Biraq Among Us-ta is-áreket ǵarysh kemesinde bolady. Oiynshylar birigip, keme júiesin isten shyǵarǵysy keletin «satqyndy» anyqtaýy tiis nemese keiipkerderdiń birin óltirýi kerek. Oiyn keiipkerleri – kishkentai túrli-tústi adamdar. Oiyndy ázirleýshilerdiń aitýynsha, oiynnyń maǵynasy -«áleýmettik dedýktsiia».
New York Times gazeti óz maqalasynda oiynnyń tanymaldylyǵynyń artýyn talqylai kele, buǵan pandemiia kezinde májbúrli oqshaýlaý sebep boldy dep jazady.
Oiynshylar arasynda kóp kezdesetin, jasóspirimder túrli forýmdarda, toptyq chattarda habar almasady jáne tanymal geimerlerdiń YouTube arnalarynda óz pikirlerin qaldyrady. Internette osy oiynǵa qatysty memder óte kóp.
Biz qandai da bolmasyn memlekette Among Us oiyny saldarynan jazataiym oqiǵalardyń nemese basqa da intsidentterdiń bolǵany týraly rastalǵan aqparatty taba almadyq.
