Foto: QR SIM baspasóz qyzmeti
"Altyn Orda" bazarynda mobildi top táýlik boiy kezekshilik atqarady. Bul týraly Saýda jáne integratsiia ministrligi habarlady.
10 maýsymda Premer-Ministrdiń orynbasary – Saýda jáne integratsiia ministri Serik Jumanǵarinniń tóraǵalyǵymen ótken áleýmettik mańyzy bar ónimderge qatysty baǵany turaqtandyrý jónindegi apta saiynǵy keńeste eldegi jáne Altyn Orda bazaryndaǵy baǵa ahýaly qaraldy.
SIM Saýda komiteti tóraǵasynyń mindetin atqarýshy Aidar Ábildabekov atap ótkendei, «Altyn Orda» bazarynda mobildik top quryldy. Oǵan Qarjylyq monitoring agenttigi, Básekelestikti qorǵaý agenttigi, Memlekettik kirister komiteti, Ishki ister ministrligi, Densaýlyq ministrligi, Tótenshe jaǵdailar ministrligi men Aýyl sharýashylyǵy ministrligi, Almaty oblysy ákimdiginiń ókilderi kirdi. Top bazarda táýlik boiy kezekshilikti atqara bastady. Satýshylardyń, jetkizýshilerdiń, júrgizýshilerdiń jáne bazarǵa baratyn azamattardyń ótinishterin qabyldaý jáne jedel den qoiý úshin «Altyn Orda Open» jedelhat-chaty jáne biryńǵai call-ortalyǵy (8 7273 195 160, 8 747 059 7054) quryldy. Kókónis ónimderin bazarǵa kelýshilerge tikelei ótkizý múmkindigi úshin sharýalardyń júk kólikterine tegin 100 oryn belgilendi. Satý oryndary qolshatyrlarmen jabdyqtalǵan, turaqty monitoring úshin kameralar ornatylǵan. Bul fermerlerge aýyl sharýashylyǵy ónimderin deldalsyz, birden tutynýshylarǵa satýǵa múmkindik beredi. Bazarda saýda júrgizý úshin sharýalar aýyl ákimdiginiń anyqtamasyn usynýy qajet.
«Almaty oblysynyń ákimdigi mobildi toptyń jumysyn kúndelikti baqylaýda ustaýy qajet. Júk kólikterine arnalǵan 100 oryn - bul jazǵy maýsymǵa ońtaily jedel shara bolyp tabylady. «Altyn Orda» aýmaǵynda statsionarlyq saýda nysandaryna oryn bólý qajet. Bul tek osy bazarǵa ǵana qatysty emes, barlyq ákimdikterge óz óńirlerindegi bazarlar men iri saýda nysandary boiynsha osyndai jumys júrgizýdi tapsyramyn», — dep atap ótti Serik Jumanǵarin.
«Keńeste deldaldyq shemalardy joiý jaǵdaiy da qaraldy. Saýda komitetiniń málimetinshe, jyl basynan beri komissiialardyń 859 otyrysy ótkizilip, 176 ónimsiz deldal alynyp tastaldy, bir apta ishinde saýda ústemesinen asyp ketýdiń jáne ónimsiz deldaldardy alyp tastaýdyń 22 faktisi anyqtaldy. Atap aitqanda, Jambyl oblysynda 15%-dan joǵary saýda ústemesi bar tútikti kespe, un jáne kúrish satyldy. Túsindirý jumystarynan keiin bul ónimderdiń baǵasy 10-25% sheginde tómendedi. Ulytaý oblysynda saýda ústemesin asyrǵany úshin kásipkerge eskertý jasaldy. Nátijesinde kúnbaǵys maiy men qyryqqabattyń baǵasy 25%-ǵa tómendedi», - dep atap ótti Aidar Ábildabekov.
Vedomstvo málimetinshe, ótken aptada áleýmettik mańyzy bar azyq-túlik taýarlaryna baǵanyń ósýi 0,1%-dy quraǵan. Eń joǵary baǵa sábizde (4,4%), kartopta (3,5%) boldy. Sonymen qatar, qyryqqabat (-5,4%), piiaz (-1,6%) baǵasynyń tómendeýi baiqalady, kúnbaǵys maiy (-1,7%), qaraqumyq (-1,5%), jumyrtqa (-1,4%), qus eti men tuz (-0,1%) baǵasynyń tómendeýi jalǵasyp jatyr.
18 óńirde ósýdiń eń joǵary indeksi belgilengen sábiz baǵasynyń ósýimen jaǵdai jekelep taldandy. Belgili bolǵandai, buǵan deiin óńirlerge Taraz qalasynyń óndirýshisinen 110 teńgeden sábiz satyp alý usynylǵan. Alaida satyp alýdy tek Astana men Almaty qalalary ǵana júrgizgen.
Aýyl sharýashylyǵy vitse-ministri Erbol Tasjúrekov kúzgi-qysqy kezeńge arnalǵan óńirlik turaqtandyrý qorlarynyń rezervterin qalyptastyrý boiynsha júrgizilip jatqan jumystardyń nátijelerin baiandap berdi. Qazirdiń ózinde 77,6 myń tonna kóleminde kúzgi kartopty nemese aldaǵy kúzgi-qysqy kezeń úshin tutyný normasynyń 85%–y, sábizdi – 23,5 myń tonnany (91%), piiazdy – 22,3 myń tonnany (152%), qyryqqabatty-16 myń tonnany (74%) jetkizýge sharttar jasaldy.
«ÁMAT baǵasyn turaqtandyrý tetikterin iske asyrýdyń úlgilik qaǵidalaryndaǵy sońǵy ózgeristerdi eskere otyryp, ÁKK-niń bos qarajatyn aýyl sharýashylyǵy taýaryn óndirýshiler men qaita óńdeý kásiporyndaryn forvardtyq qarjylandyrý úshin baǵyttaý qajet. Kelisimsharttardyń eń az kólemi bar óńirler fermerlermen forvardtyq sharttar jasasý jóninde sharalar qabyldaýy qajet. Kartop, sábiz, piiaz jáne qyryqqabat óndirýshileriniń tizimi ákimdikterge joldandy»,— dedi Aýyl sharýashylyǵy vitse-ministri.
Keńes nátijelerin qorytyndylai kele, Serik Jumanǵarin Aýyl sharýashylyǵy ministrligine ákimdiktermen jasalǵan kúzgi egin jinaýǵa arnalǵan barlyq kelisimsharttardyń úlgilik Qaǵidalardaǵy jáne qarjy aǵyndary boiynsha ózgeristerge sáikestigin tekserýdi tapsyrdy.
«Ózgerister tek óndirýshilerden 9 taýar pozitsiiasyn satyp alýdy talap etedi. Tekserý nátijeleri týraly bir apta merzimde baiandalsyn», — dedi Serik Jumanǵarin.
