Foto: redtable.kz
Almaty turǵyndary meiramhanalardaǵy aýyzashar máziri baǵasynyń qymbattap ketkenin aityp, narazylyqtaryn bildirdi. Aitýlarynsha, qazir keshki astyń quny bir adamǵa 10 myń teńge, - dep habarlaidy Tengrinews.kz saity "KTK" telearnasyna silteme jasap.
Almatylyq Abylai Palmaǵambetov óziniń toǵyz jyl qatarynan oraza ustap kele jatqanyn, sońǵy tórt jylda aýyzasharda turaqty túrde meiramhanalar men dámhanalardan tamaqtanatynyn aitady. Alaida bul joly mekemelerdegi baǵa qoljetimsiz bolyp ketkenin jetkizdi.
"Oraza bastalmas buryn aǵaiyn-týys, dos-jarandy aýyzasharǵa shaqyraiyn dep kóptegen dámhana, meiramhanalardy araladym. Biraq baǵasy qolaily mekeme taba almadym. Bir adamǵa shamamen 8-10 myń teńge dep tur. Bul múlde qalypty baǵa emes qoi. Týra eki-úsh ai buryn bir adam úshin keshki as quny shamamen 5 myń teńge turatyn. Aýyzashar as máziriniń baǵasynyń bulai kúrt kóterilýine ne sebep?", - dep ashýlandy Abylai Palmaǵambetov.
Al kásipkerler baǵanyń ósýine azyq qunynyń ósýi sebep ekenin aitady. Máselen, et pen kókónis baǵasynyń ósýi shyǵynmen jumys isteýge kedergi eken.
"Qazir kartop, piiaz siiaqty barlyq ónimderdiń kóktemgi qymbattaýy baiqalady. Sebebi bir ónimniń maýsymdyq taýsylatyn ýaqyty. Al ekinshi ónim sórelerge áli shyqqan joq. Sondyqtan piiaz osyǵan deiin 150 teńge bolsa, alda 350 teńgege deiin jetedi dep kútilip otyr. Bul maýsymdyq baǵalar. Bizde sál paida taýyp, jumysshylarǵa jalaqy tóleýimiz kerek", - dedi Qazaqstan Restoratorlar klýbynyń múshesi Zýlfiia Iýsýpova.
Restoratorlar baǵany ustap, tómendetý úshin úkimettiń aralasýy kerek ekenin alǵa tartty.
