فوتو: redtable.kz
الماتى تۇرعىندارى مەيرامحانالارداعى اۋىزاشار مەزٸرٸ باعاسىنىڭ قىمباتتاپ كەتكەنٸن ايتىپ, نارازىلىقتارىن بٸلدٸردٸ. ايتۋلارىنشا, قازٸر كەشكٸ استىڭ قۇنى بٸر ادامعا 10 مىڭ تەڭگە, - دەپ حابارلايدى Tengrinews.kz سايتى "كتك" تەلەارناسىنا سٸلتەمە جاساپ.
الماتىلىق ابىلاي پالماعامبەتوۆ ٶزٸنٸڭ توعىز جىل قاتارىنان ورازا ۇستاپ كەلە جاتقانىن, سوڭعى تٶرت جىلدا اۋىزاشاردا تۇراقتى تٷردە مەيرامحانالار مەن دەمحانالاردان تاماقتاناتىنىن ايتادى. الايدا بۇل جولى مەكەمەلەردەگٸ باعا قولجەتٸمسٸز بولىپ كەتكەنٸن جەتكٸزدٸ.
"ورازا باستالماس بۇرىن اعايىن-تۋىس, دوس-جاراندى اۋىزاشارعا شاقىرايىن دەپ كٶپتەگەن دەمحانا, مەيرامحانالاردى ارالادىم. بٸراق باعاسى قولايلى مەكەمە تابا المادىم. بٸر ادامعا شامامەن 8-10 مىڭ تەڭگە دەپ تۇر. بۇل مٷلدە قالىپتى باعا ەمەس قوي. تۋرا ەكٸ-ٷش اي بۇرىن بٸر ادام ٷشٸن كەشكٸ اس قۇنى شامامەن 5 مىڭ تەڭگە تۇراتىن. اۋىزاشار اس مەزٸرٸنٸڭ باعاسىنىڭ بۇلاي كٷرت كٶتەرٸلۋٸنە نە سەبەپ?", - دەپ اشۋلاندى ابىلاي پالماعامبەتوۆ.
ال كەسٸپكەرلەر باعانىڭ ٶسۋٸنە ازىق قۇنىنىڭ ٶسۋٸ سەبەپ ەكەنٸن ايتادى. مەسەلەن, ەت پەن كٶكٶنٸس باعاسىنىڭ ٶسۋٸ شىعىنمەن جۇمىس ٸستەۋگە كەدەرگٸ ەكەن.
"قازٸر كارتوپ, پيياز سيياقتى بارلىق ٶنٸمدەردٸڭ كٶكتەمگٸ قىمباتتاۋى بايقالادى. سەبەبٸ بٸر ٶنٸمنٸڭ ماۋسىمدىق تاۋسىلاتىن ۋاقىتى. ال ەكٸنشٸ ٶنٸم سٶرەلەرگە ەلٸ شىققان جوق. سوندىقتان پيياز وسىعان دەيٸن 150 تەڭگە بولسا, الدا 350 تەڭگەگە دەيٸن جەتەدٸ دەپ كٷتٸلٸپ وتىر. بۇل ماۋسىمدىق باعالار. بٸزدە سەل پايدا تاۋىپ, جۇمىسشىلارعا جالاقى تٶلەۋٸمٸز كەرەك", - دەدٸ قازاقستان رەستوراتورلار كلۋبىنىڭ مٷشەسٸ زۋلفييا يۋسۋپوۆا.
رەستوراتورلار باعانى ۇستاپ, تٶمەندەتۋ ٷشٸن ٷكٸمەتتٸڭ ارالاسۋى كەرەك ەكەنٸن العا تارتتى.
