Politsiia qyzmetkeri Jaqsylyq Sultanov Almaty mańyndaǵy ushaq apatynda kishkentai náresteni qalai qutqarǵanyn aityp berdi, dep habarlaidy "Ult aqparat".
«Bizge shaqyrtý kelip tústi. Jaqyn mańda júrgen edik, oqiǵa ornyna tez jettik. Áriptesim ekeýmiz birneshe adamdy syrtqa alyp shyqtyq. Arasynda marqumdar da boldy. Sosyn bizge «úidiń art jaǵyn qarańdarshy, taǵy adamdar bolýy múmkin» dedi. Biz ol jaqtan 30-35 jastaǵy áieldi taptyq. Ol aiaǵy synyp, únsiz jatyr eken. Keýdesinde kishkentai sábi jatty. Biraq alǵashynda men onyń bala ekenin bilmedim. Bilgen soń áielge «balany alyp, jedel járdemge berem» dedim. Ol kózin jumyp, kelisimin berdi. Balany kótere bergende ol jylap qoia berdi. Biraq jolda úni shyqpai qaldy. Men ony dybysyn shyǵarsa eken dep silkidim. Sosyn náresteni jedel járdem qyzmetkerlerine tapsyrdym», - deidi Jaqsylyq Sultanov.
Onyń aitýynsha, bala shamamen 6 ailyq.
«Balaqai tipti kishkentai. Bir jasar balaǵa uqsamaidy. Ózim de áke bolǵan soń bilem ǵoi», - deidi politsei.
Jaqsylyq Sultanov – Almaty qalalyq politsiia departamenti patrýl politsiia polkiniń aǵa leitenanty. Ol mundai jaǵdaiǵa birinshi ret tap bolyp otyr.
Aita keteiik, kishkentai náresteni qutqarý týraly video ushaq apatynen keiin áleýmettik jelilerde tarap ketti. Keiinnen onyń 9 ailyq Ádiljan Ǵatiat ekeni belgili boldy.
Bul bala mi jaraqatymen aýrýhanaǵa túsken. Ishi, ishki organdary soqqy alǵan. Jaǵdaiy birqalypty. Al onyń ákesi 27 jastaǵy Ǵatiat Maqsut Bolatqanuly bas jaraqatymen shuǵyl meditsinalyq qyzmet kórsetý aýrýhanasyna jatqyzyldy.
Anasy 27 jastaǵy Ǵatiat Aisulý Erqanatqyzy kishi jambastaǵy urshyq býynynyń soqqysy, bel omyrtqasynyń jaraqaty diagnozymen tústi.
