Pandemiia bastalǵaly beri Almatyǵa shetelden 13 myńnan astam adam PTR testisiz keldi. Bul týraly Almaty qalalyq sanitarlyq-epidemiologiialyq baqylaý departamentiniń bastyǵy, qalanyń bas memlekettik sanitarlyq dárigeri Jandarbek Bekshin onlain brifing barysynda aitty, dep habarlaidy "Ult aqparat".
"Ádette basqa elden kelgen azamattardyń 90%-y jasyl dálizden ótedi, óitkeni olardyń qolynda PTR-testileýdiń teris nátijesi bar. Desekte, aqshalaryn únemdep PTR anyqtamasyz keletinder de bar. Mundai adamdar basqa adamdarǵa úlken qaýip tóndiredi. Memleket mundai azamattardy tegin testileýden ótkizip, tamaqtandyryp, kólikpen qamtamasyz etedi. Pandemiia bastalǵaly beri 13 myńnan astam jolaýshy Almatyǵa shetelden PTR testisiz keldi. Shetelden kelgen 85 azamattan koronavirýs anyqtaldy. Olar Túrkiia, Egipet pen BAÁ jáne basqa elderden ushyp kelgen jolaýshylar", - dedi Jandarbek Bekshin.
Sonymen qatar, qalanyń bas sanitarlyq dárigeri PTR anyqtamasy joq azamattardy memleket tegin meditsinalyq tekserýden ótkizetindigin atap ótti.
"Qazir PTR test quny - 8025 teńge. 6 myń teńge -jatyn orny, azyq-túlik pen jol aqysy - 4 500 teńge. Osydan-aq, memleket qansha aqsha jumsaitynyn esepteýge bolady. Biz siiaqty azamattaryna qamqorlyq tanytatyn memleketter kemde-kem. Biz óz azamattarymyzdy shetelde qaldyra almaimyz", - dep atap ótti ol.
