Almatyda Yqylas atyndaǵy halyq aspaptar mýzeii qoryna Aqan seriniń dombyrasy tapsyryldy, dep habarlaidy Ult.kz tilshisi QazAqparat agenttigine silteme jasap.
Aqan seriniń tarihi dombyrasyn mýzei qoryna jazýshy Sáken Júnisovtiń urpaqtary tapsyrǵan. Ádebiet súier qaýymǵa belgili jazýshy Sáken Júnisov Aqan seri ómirine arnap roman jazǵan. Jazýshy eki tomdyq romandy jazý barysynda dombyrany Kókshetaýdan tapqan.
Búgin Aqan seri dombyrasynyń mýzei qoryna qabyldaýyna orai jyr keshi ótti. Ánshi Jolaman Qujymanov, Ramazan Stamǵaziev, Talǵat Ábýǵazy, Gúlsim Arysbaeva bastaǵan dástúrli ánshiler Aqan seriniń «Shámshiqamar», «Mańmańger», «Balqadisha» ánderin shyrqady. Keshke Almaty ákimi Baýyrjan Baibek qatysty.
«Elbasy N. Nazarbaevtyń «Bolashaqqa baǵdar: rýhani jańǵyrý» atty maqalasynda: «Ulttyq salt-dástúrlerimiz, tilimiz ben mýzykamyz, ádebietimiz, joralǵylarymyz, bir sózben aitqanda ulttyq rýhymyz boiymyzda máńgi qalýǵa tiis. Abaidyń danalyǵy, Áýezovtiń ǵulamalyǵy, Jambyldyń jyrlary men Qurmanǵazynyń kúileri, ǵasyrlar qoinaýynan jetken babalar úni - bular bizdiń rýhani mádenietimizdiń bir parasy ǵana», delingen bolatyn. Bul baǵytta ult pen urpaq úshin kóterilgen mańyzdy máselelerdi iske asyrý maqsatynda, Yqylas atyndaǵy halyq mýzykalyq aspaptar mýzeii, ulttyq ónerdi jasaýshy tulǵalardyń jádiger muralaryn jinaýdy qaita órbitýde. Osyǵan orai, ulttyq rýhaniiatymyzdyń qalyptasyp damýyna zor yqpalyn tigizgen, qazaq ónerin biik shyńǵa kóterip sońynda óshpes iz qaldyrǵan, Arqa sal-serilik óneri degende esimderi birinshi bolyp atalatyn - Aqan seri men Birjan sal bolsa, ǵasyr asyp Aqan seriniń qolyna ustaǵan qara dombyrasy mýzei qoryna alyndy», - dedi keshti júrgizýshi Murat Ábýǵazy.
Aita keteiik, atalǵan mýzeide Birjan saldyń da dombyrasy saqtalǵan.
Aqan seri 1843 jyly burynǵy Kókshetaý oblysy, Úlken Qoskóldiń mańynda dúniege kelgen, 1913 jyly dúnieden ozdy. Aqan seriniń mýzyka týyndylary qazaq óneriniń órkendeýine zor yqpalyn tigizdi. Onyń shyǵarmalaryn belgili ánshiler Á. Qashaýbaev, J.Elebekov, M.Erjanov, J.Kármenov jáne taǵy da basqalar el igiligine ainaldyrdy. Qazaqstan kompozitorlarynyń simfoniialyq jáne operalyq shyǵarmalaryna keńinen engizilip, Aqan ánderi ekinshi ómirin bastady. Seriniń ómiri men taǵdyry týraly Iliias Jansúgirov «Qulager» poemasyn, Ǵ. Músirepov «Aqan seri - Aqtoqty» dramasyn, S. Júnisov «Aqan seri» romanyn jazdy.
