«Atameken» UKP basshysy Timýr Qulybaev Almaty qalasynda tótenshe jaǵdai saldaryn, aǵymdaǵy ózekti máselelerdi talqylaý, biznesti qoldaý úshin memleket tarapynan qandai qoldaý quraldary qajettigin anyqtaý maqsatynda óńirdiń biznes-qoǵamdastyǵymen onlain kezdesý ótkizdi, – dep habarlaidy QazAqparat.
«Almaty – elimizdiń eń iri óńirleriniń biri. Qazaqstan biznesiniń jartysy osy óńirde shoǵyrlanǵan. Ulttyq palata búkil el aýqymynda bizneste týyndaityn barlyq máseleni jiti qadaǵalaityn bolady. Biz áriptesterimizben osyndai kezdesýlerdi ai saiynǵy negizde júrgizemiz dep kelistik. Osy máseleler legin Ulttyq palata retinde Úkimetpen talqylaityn bolamyz, birlesip, daǵdarystan shyǵý joldaryn bizneske usynamyz», – dedi Timýr Qulybaev.
Megopolistiń ekonomikalyq ahýaly jaiynda Almaty qalasy kásipkerler palatasynyń direktory Nariman Ábilshaiyqov baiandady. Spikerdiń aitýynsha, TJ kezeńinde Almaty qalasy kásipkerler palatasy jedel jeli rejiminde jumys istedi. 2020 jyldyń 16 naýryzynan bastap 11 mamyr aralyǵynda kásipkerlerden 42 618 ótinim kelip túsken, sonyń ishinde 35 201 ótinim – koll-ortalyq, 5 344 ótinim – shtab músheleriniń mobildi telefondaryna, 1 789 ótinim – elektrondy jáne jazbasha túrde, 284 ótinim – áleýmettik jeliler arqyly kelip túsken.
«Almatyda qyzmet kórsetý salasy edáýir zardap shekti. Qalada memlekettik sektor jáne densaýlyq saqtaý salasynan basqa qyzmetter óndirisi sektorynda búkil jumys kúshiniń 74%-y jumys isteidi. Atalǵan salanyń aýyr ahýalyn QR Eńbek jáne halyqty áleýmettik qorǵaý ministrliginiń derekteri dálel bola alady. Vedomstvoǵa áleýmettik tólem alýǵa 898 136 adam (salada jumys isteitinderdiń 90%-y) ótinim bergen, sonyń ishinde 447 363 adam tólem alǵan», – dedi Óńirlik palata direktory.
Onyń aitýynsha, 2019 jyldyń qańtar-qyrkúieginde saýda salasy boiynsha naqty kólem indeksi 103,4%-dy qurady.
«Biylǵy jaǵdaida jumystan qysqarǵan nemese merzimsiz demalysqa jiberilgen jumyskerlerdiń basym bóligi saýda salasynda tirkelgen – 8705 adam, ónerkásipte – 5130 adam, ornalastyrý jáne tamaqtandyrý boiynsha qyzmet salasy – 1768 jáne densaýlyq saqtaý salasynda 1282 adam», – dedi ol.
Nariman Ábilshaiyqov saýda jáne oiyn-saýyq ortalyqtaryna siiaqty bazarlarǵa jumys isteýge ruqsat berýdi, jabyq alańǵa qaraǵanda ashyq bazar alańdarynda sanitarlyq normalardy ustaný qolailyraq ekenin alǵa tartyp, osy sektordaǵy kásipkerlerge jumys isteýge ruqsat berýdi qaita qarýdy surady.
Saýda salasynyń ahýaly jaiynda jiyn barysynda «Tigrohaýd firmasy» JShS ámbebap bazarynyń direktory Janar Qurabaeva jalǵa alýshylardyń qarjylyq ainalymy maýsymdyq taýarlarǵa salynyp, salaǵa kepilzatsyz jeńildikpen nesie retinde kómek kórsetýdi surady.
«Almatydaǵy 52 bazar ishinde TJ kezeńinde nebári 12 bazar jumys istedi. Bazarlarda 32 myń jalǵa alýshy jumys istese, TJ kezeńinde nebári 13% nemese 4 myńǵa jýyq adam ǵana tabys tabýǵa múmkindik aldy. Al jalǵa alýshylar úshin bazarlarda jumys isteý tabys tabýdyń jalǵyz kózi», – dedi spiker.
Jospar boiynsha 1 maýsymǵa qarai óńirdegi epidemiologiialyq ahýaldy esepke ala otyryp, bazarlardyń ashylýy sheshiledi.
«Eger adamdar sanitarlyq normalardy ustanyp, qorǵaný sharalaryn buzbasa, onda biz osy adamdarǵa, ásirese oblystan qalada qatynaityndarǵa jumys isteýge múmkindik berýimiz kerek. Qazir adamdar qalaǵa óte almai jatyr. Eger oblystaǵy adamdar jumys isteýge kelse epidemilogiialyq ahýal nege nasharlap ketetinin túsinbeimin. Bul másele de sheshiledi degen oidamyn», – dedi Timýr Qulybaev.
Qyzmet salasynyń ókilderi qoldaý sharalary retinde jeńildikpen nesie bólý, bank aldyndaǵy nesieler men salyqtyq tólemder, kommýnaldyq tólemder boiynsha shegerim suraidy.
«Qoǵamdyq tamaqtaný salasynda 24 jyl boiy jumys isteimiz. Karantinge deiin kúnine shamamen 30 myń adamdy tamaqtandyryp otyrdyq. Kompaniiada 2 myńǵa jýyq jumys orny bar, olardyń 95%-y áielder. Jumysqa 25 mamyr kúni kiristik, sondyqtan 1 shildege qarai salyq tólei almaimyz. Osyǵan bailanysty bizge taǵy 3-5 ai tólemderdi shegerýge ýaqyt berileýin suraimyz», – dedi «Qaǵanat» ashanalar jelisiniń direktory Shynar Bógenbaeva.
UKP basshysy el aýqymynda tólemderdi oryndamaýdyń tizbekti reaktsiiasy júrip jatqanyn, qazir ekonomikaǵa qarajat salý kerek ekenin aitty.
«Birinshi kezekte saýda, qyzmet kórsetý salasyna, óitkeni bul sektorǵa qarjy ainalymy qajet. Kepilzatsyz nesie berý quraly qaralýda. Onyń qoldaný aiasyn, jáne qandai kólemde qoldanýy kerek ekenin qaraityn bolamyz», – dedi Timýr Qulybaev.
