Almatyda aýa raiynyń qolaisyzdyǵyna bailanysty jol jóndeý jumysy ýaqytsha toqtatyldy.
«Aýa raiynyń qolaisyzdyǵyna bailanysty 21 sáýirde joldardy jóndeý jumystary ýaqytsha toqtatyldy», - dep habarlady Almaty qalalyq mobildilik basqarmasynan.
Aita keteiik, sáýir aiynyń basynan bastap qala kóshelerinde jóndeý bastaldy. Osy ýaqytqa deiin joldaǵy 4 myńǵa jýyq oiyq-shuńqyr biteldi.
Kúndelikti jóndeý jumysyna 400-den astam jumysshy men 155 arnaiy tehnika jumyldyrylady. Almatynyń 256 kóshesine jóndeý josparlanǵan.
Jalpy, Almaty qalasynda kóshe-jol jelisiniń uzyndyǵy 3 096,8 shaqyrym, kóshe sany - 2 746. Onyń ishinde magistraldy mańyzy bar kóshe sany - 385, olardyń uzyndyǵy 1 150 shaqyrym. Jergilikti mańyzy bar kóshe sany - 2361, olardyń uzyndyǵy 1 946,8 shaqyrym.
