Almaty oblysynyń politsiia qyzmetkerleri 69 jastaǵy almatylyq professordyń joǵalyp ketýine qatysy bar er adamdy ustady, dep habarlady Sputnik tilshisi.
17 tamyz kúni Almaty qalasynda Qazaq ulttyq agrarlyq ýniversitetiniń oqytýshysy, professor Aǵybai Smaǵulov joǵalyp ketken bolatyn. Onyń joǵalyp ketkeni týraly aqparatty azamattyq belsendi Islam Ýgýshev áleýmettik jelilerde taratty. Smaǵulovtyń týystary halyqtan ony izdeýge kómektesýdi ótindi. Habarlamada oqytýshy Qarasai aýdanyna qarai ketkeni atalyp ótti.
Búgin izdeýde bolǵan adamnyń denesi Almaty oblysy aýmaǵynan tabylǵany jáne onyń joǵalyp ketýine jergilikti turǵyndardyń biriniń qatysy bar ekeni anyqtaldy.
Almaty oblysy IID baspasóz qyzmeti aqparatty rastap, politsiia qazirdiń ózinde kisi óltirý faktisi boiynsha sotqa deiingi tergeýdi bastaǵanyn habarlady.
"Joǵalǵan adam týraly aryz 21 tamyz kúni Qarasai AIIB-ge tústi. Er adamnyń qaida ekenin anyqtaýǵa baǵyttalǵan jedel-izdestirý is-sharalary kezinde onyń joǵalýyna qatysy bar degen kúdikpen jergilikti turǵyndardyń biri ustaldy. Ári qarai tergeý barysynda kúdikti izdeýde bolǵan er adamnyń jerlengen ornyn kórsetti. Qazir Qazaqstan Respýblikasy Qylmystyq kodeksiniń 99-babyna sáikes sotqa deiingi tergeý bastaldy. Qylmysqa kúdikti qamaýǵa alyndy", — dep habarlady oblystyq IID baspasóz qyzmeti.
Aita keteiik, Aǵybai Smaǵulovty bir jyl buryn stýdentter uryp-soǵyp, tonap ketken bolatyn. Joǵary oqý ornynda oqityn stýdentter onyń 23 million teńgesin tartyp alyp ketken, zardap shegýshiniń toǵyz qabyrǵasy syndy.
