Maýsym aiynda qazaqstandyqtar jedel járdemdi jii shaqyra bastaǵan. Osy sebepti, meditsinalyq kómekti kútý ýaqyty da uzarǵan, dep habarlaidy "Ult aqparat".
Búgin Almaty qalalyq Qoǵamdyq keńesiniń onlain otyrysy ótti. Onda qoǵam qairatkeri, jýrnalist Sergei Ponomarev turǵyndardan túsip jatqan suraqty qoidy. Olardyń sózinshe, qońyraý shalynǵannan keiin jedel járdemniń keletin ýaqyty eki saǵattan eki kúnge deiin sozylady. Múldem kelmei qalatyn jaǵdailar da bolady.
«Iá, biz bul jaǵdai týraly bilemiz. Turǵyndar bailanys ortalyǵymyzǵa shaǵymdaryn aityp, habarlasady. Qazir jedel járdem qyzmetine júkteme artty. Kúnine 6 myńǵa jýyq qońyraý túsedi. Olardyń 50% aýrýhanaǵa jatqyzýmen jáne jedel járdemniń kelýimen bailanysty: 30% jedel járdem boiynsha, 20% aýrýhanaǵa jatqyzý boiynsha», – dedi «Mindetti áleýmettik meditsinalyq saqtandyrý qory» kommertsiialyq emes aktsionerlik qoǵamynyń basqarma tóraǵasy Aibatyr Jumaǵulov.
Onyń aitýynsha, qazir barlyq máseleni sheshý múmkin bolmai jatyr.
«Ár jaǵdaidy jeke qarastyrýǵa tyrysamyz jáne olardy múmkindiginshe sheshýge áreket jasaimyz», - dedi ol.
Óz kezeginde, Ulttyq shuǵyl meditsinany úilestirý ortalyǵy basqarma tóraǵasynyń mindetin atqarýshy Baýyrjan Júsipov kúnine shaqyrtýlarǵa respýblika boiynsha 1400 brigada shyǵatynyn atap ótti.
«Búgingi tańda bizde 1900-ge jýyq jedel járdem kóligi bar. Árine, kólik jetispeýshiligi baiqalady. Dese de, atalǵan problemany aqyryndap sheship jatyrmyz. Máselen, ótken jyly 300-ge jýyq jedel járdem kóligi satyp alyndy. Biyl 800 dana satyp alýdy josparlap otyrmyz. Qalyptasqan jaǵdaiǵa bailanysty jedel járdem salasyn zamanaýi jabdyqtarmen qamtamasyz etýge de erekshe kóńil bólinip otyr. Jyl sońyna deiin taǵy 800-den astam kólik satyp alynbaq», – dedi Baýyrjan Júsipov.
Onyń aitýynsha, ústimizdegi jyldyń qańtar-mamyr ailary aralyǵynda jedel járdem brigadalary 3 millionǵa jýyq qońyraýǵa qyzmet kórsetken. «Ótken jylmen salystyrǵanda bul kórsetkish edáýir ulǵaiǵan. Elde jedel járdem qyzmetiniń júktemesi 40% artty»,– dedi ol.
Sonymen qatar, B.Júsipov júktemeniń artýyna bailanysty qyzmet kórsetý tártibiniń ózgergenin de tilge tiek etti. Máselen, naýqastyń ómirine qaýip tóngen jaǵdaida brigada 10-15 minýtta jetedi. Al aiqyn qaýip bolmasa, kelý ýaqyty 60 minýtqa deiin sozylady. Buǵan qosa, koronavirýs juqtyrǵandarǵa kómektesýdiń de óz algoritmi bar.
