Almatyda zardap shekken shaǵyn jáne orta biznes ókilderine alǵashqy ótemaqy tóleý bastaldy, dep habarlaidy QazAqparat.
Almaty ákimi Baqytjan Saǵyntaevtyń tapsyrmasy boiynsha óńirlik komissiia shaǵyn jáne orta biznes sýbektilerine keltirilgen zalal somasyn anyqtaý boiynsha jumysty jalǵastyryp jatyr.
Búgin alǵashqy eki kásipkerge tártipsizdik kezinde keltirilgen zalal úshin ótemaqy tólendi.
Aleksandr Tkachenko «Mobilka» saýda úiinde uialy telefondar satatyn. Onyń býtigi jappai tártipsizdik kezinde tonaldy. Nátijesinde kásipker 3,2 mln teńge shyǵynǵa ushyrady. Jeke kásipker barlyq qajetti qujattardy rásimdegennen keiin, oǵan tolyq kólemde qarajat aýdaryldy.
Ekinshi kásipker, Árkenjan Myrzabaev «Aziia park» SOSO jáne «Maksima» SOSO 2 býtikti jalǵa alyp, balalar kiimin satýmen ainalysqan. Tártipsizdiktiń saldarynan onyń biznesine 1,8 mln teńge zalal keltirildi. Onyń da esep shotyna tiisti qarajat aýdaryldy.
Aldyn ala málimetter boiynsha, Almatyda tártipsizdik pen tonaý saldarynan 1581 kásipkerlik sýbektisi zardap shekken. Shyǵyn somasy 45,6 mlrd teńge. Zalal somasyn aiqyndaý jónindegi óńirlik komissiia zardap shekken obektiler boiynsha, onyń ishinde jergilikti jerlerge shyǵa otyryp, derekterdi jinaýdy jalǵastyrady.
Qala ákimi Baqytjan Saǵyntaevtyń tapsyrmasyna sáikes qala ShOB-ke birneshe baǵyt boiynsha qarjylyq jáne qarjylyq emes qoldaý kórsetedi. Osylaisha, zardap shekken biznes sýbektileri jylý, gaz, sýmen jabdyqtaý jáne káriz boiynsha 3 aiǵa kommýnaldyq shyǵyndardan bosatylady.
Sonymen qatar, qala menshigindegi úi-jailardy jalǵa alatyn kásipkerler 6 aiǵa jalgerlik tólemnen bosatylady.
Qosymsha Almaty Business-2025 qalalyq baǵdarlamasy boiynsha kásipkerlerge ainalym qarjysyn tolyqtyrýǵa 10 mln teńgege deiin jyldyq 2%-ben 12 aiǵa kepilmen nemese «Almaty» ÁKK ishinara kepildigimen tómendetilgen nesie beriledi.
Sonymen qatar, zardap shekken kásipkerlerge negizgi qaryzdy óteý merzimin keiinge shegerip, «Almaty finans» JShS men mikroqarjy uiymdarynda 180 kúnge deiingi merzimge aiyppuldar men ósimpuldardan bosatady. Nesieleýdiń eń uzaq merzimi jarty jylǵa, qoldanystaǵy 7 jyldan 7,5 jylǵa deiin ulǵaityldy, kepilsiz nesieleý boiynsha mólsherlemeler jyldyq 12%-dan 9%-ǵa deiin tómendetildi.
