Pandemiiaǵa bailanysty musylmandar úshin qasietti Ramazan aiynda meshitterde jamaǵatpen namaz oqylmaidy. Bul týraly onlain brifing barysynda qalanyń bas imamy Erkinbek Shoqai aitty, dep habarlaidy "Ult aqparat".
Almatynyń bas imamy Erkinbek Shoqai musylman qaýymyn kele jatqan qasietti Ramazan aiymen quttyqtady.
«Bizdiń halqymyz ejelden Ramazandy erekshe qasterlep: «On eki aidyń sultany»,- dep ataǵan. Berekesi mol aida jaramazan jyryn aityp, orazanyń kelgenin qýanyshpen jetkizip, nasihattaǵan», - dedi Erkinbek Shoqai.
Imam qala meshitterinde jamaǵatpen taraýyq namazy oqylmaitynyn tilge tiek etti.
«Alǵashqy taraýyq namazy búgin oqylady. Biyl da qalamyzdaǵy epidahýaldyń kúsheiýine bailanysty meshitterde jamaǵatpen taraýyq namazy oqylmaidy», - dedi qalanyń bas imamy Erkinbek Shoqai.
Spiker, árkim taraýyq namazyn óz shańyraǵynda otbasy múshelerimen oqýyna keńes berdi. Biz osylai oqshaýlaný arqyly juqpaly indetti jeńemiz.
Aita keteiik, 2021 jyldyń qasietti Ramazan aiy 13 sáýirde bastalyp, 12 mamyrda aiaqtalady.
8 mamyrdan 9 mamyrǵa qaraǵan tún - qasietti Qadir túni. 13 mamyr - Oraza aittyń birinshi kúni.
