Tanymal prodiýser Baian Alagózova jubaiy Tursyn Alagózovtiń burynǵy áielimen qarym-qatynasy týraly sóz qozǵap, onymen bir dastarhan basynda otyrýǵa qarsy emes ekenin aitty. Bul týraly ol jýrnalist Aman Tasyǵanǵa bergen suhbatynda málimdedi, dep habarlaidy ult.kz.

Suhbat barysynda jýrnalist prodiýserden kúieýiniń birinshi áielimen kezdesip, birge dastarhan basynda otyra ala ma dep surady. Baian Alagózova mundai múmkindikti joqqa shyǵarmaitynyn jetkizdi. Onyń pikirinshe, erli-zaiyptylardyń joly ekige aiyrylǵanymen, aradaǵy syilastyq joǵalmaýy kerek.
"Eshqashan "eshqashan" deme deidi ǵoi. Eger adamdar ajyrasqanda aiǵai-shýsyz, dúnie bólispei, urys-kerissiz, tóbelessiz, bir-birine qastyq jasamai, mádenietti túrde aiyrylysa alsa, bári áldeqaida jaqsy bolar edi. Sondyqtan men eshteńeni joqqa shyǵarmaimyn. Ol – men aralasatyn balalardyń anasy. Men buǵan qarsy emespin", – dedi prodiýser.
Áńgime barysynda Baian Alagózova Tursyn Alagózovtiń uly Arsenniń de jaqyn arada úilenýi múmkin ekenin aitty. Ol Arsen shańyraq kóterse, jubaiymen birge toiyna baratynyn, mundai qýanyshty kúnde burynǵy ókpe-renishke oryn joq ekenin jetkizdi.
Prodiýser Aiarýdyń bolashaqtaǵy toiyna qatysty da osyndai pikir bildirdi. Onyń sózinshe, ata-analardyń arasyndaǵy túsinispeýshilik balalardyń ómirine kóleńke túsirmeýi tiis. Ásirese, bala ákesimen nemese anasymen aralasqany úshin eshkimniń aldynda aqtalmaýy kerek.
"Balalardyń ákesine nemese anasyna barǵan saiyn aqtalyp, ózin kináli sezingenin qalamaimyn. Ótken – saǵym. Barlyq ókpe-renishimdi, kórgen qiyndyǵymdy jiberemin. Men tek beibitshilik pen tatýlyqty qoldaimyn. Sondyqtan esigimiz ashyq", – dedi Baian Alagózova.
Osylaisha, prodiýser ótkendegi renishterdi umytyp, balalardyń baqyty úshin burynǵy kelispeýshilikterdi artta qaldyrýǵa daiyn ekenin ańǵartty. Ol otbasyndaǵy eresekterdiń qarym-qatynasy qandai bolsa da, onyń salmaǵyn balalar kótermeýi kerek dep esepteidi.
Baian Alagózova kim?
Baian Maqsatqyzy Alagózova – qazaqstandyq prodiýser, aktrisa, telejúrgizýshi jáne kásipker. Ol 1974 jyly 9 qańtarda Oral qalasynda dúniege kelgen.
Eńbek jolyn jýrnalistikadan bastap, keiin telejúrgizýshi retinde tanyldy. 1993 jyly rejisser Talǵat Temenovtiń "Mahabbat beketi" filminde basty rólderdiń birin somdady.
2006 jyly qurylǵan KeshYOU tobynyń prodiýseri retinde qazaqstandyq shoý-biznestiń damýyna úles qosty. Sondai-aq Shine Production prodiýserlik ortalyǵyn quryp, "Qazaq arýy" baiqaýyn uiymdastyrdy jáne birqatar kinotýyndynyń jaryqqa shyǵýyna atsalysty.
2025 jyly Qazaqstannyń eńbek sińirgen qairatkeri ataǵyn aldy.