Almatyda Ramazan aiynda 100 myń dana sý men qurma taratylady. Bul týraly brifing barysynda shahardyń bas imamy Tólebi Ospan aitty, dep habarlaidy QazAqparat.
Onyń aitýynsha, Almaty meshitterinde qasietti Ramazan aiyna arnalǵan jospar bekitildi.
«Biyl qaladaǵy 52 meshittiń 47-sinde taraýyq namazynda quran hatym túsiriledi. Qalǵan 5 meshitte taraýyq namazy quran hatymsyz oqylady. Ramazan quran aiy. Sondyqtan,, osy aida qala meshitterinde quran álippesi men namaz úiretý kýrstary qarqyndy júrgiziledi», - dedi Almaty qalasynyń bas imamy Tólebi Ospan.
Sonymen qatar, ol Almaty ortalyq meshitinde «Ramazan shatyry» qurylyp, kúndelikti 500 kisige aýyzashar dastarhany jaiylatynyn jetkizdi.
Qalanyń basqa da meshitterinde aýyzashar beriledi. Aýyzashar bergisi keletin kisiler meshitterdegi jaýapty adamdarǵa jolyǵýlaryna bolady.
«Orazanyń alǵashqy kúni jurtshylyqqa oraza aiynyń kelgenin súiinshi suraý maqsatynda «Qosh keldiń, Ramazan!» aidarymen qala kóshelerinde 100 myń dana sý men qurma taratylady. Bul sharaǵa imamdar bastaǵan jastar jamaǵaty men blogerler jumyldyrylady. Sonymen qatar «Jaqynyńa syilyq syila» jáne «Jarapazan» estafetalary uiymdastyrylady», - dedi Tólebi Ospan.
