Politsiia qyzmetkerleri Almatyda páterdi esirtki zerthanasyna ainaldyryp, esirtki shyǵaryp kelgen qylmystyq toptyń jolyn kesti, dep habarlaidy "Ult aqparat".
«Taiaýda ǵana reseilik áriptestermen arnaiy operatsiia barysynda ońtústik astanada taǵy bir zerthana joiyldy. Almaty qalasynyń úsh turǵyny ustalyp, olardan 10 keli mefedron tárkilendi. Ózara sybailasqan olar óndiristi qylmystyq top qatysýshylarynyń biriniń páterinde jolǵa qoiǵan. Shikizatqa syrttan tapsyrys berip otyrǵan. Al daiyn esirtkini Almatyda taratýdy kózdegen», - dedi QR IIM esirtki qylmysyna qarsy is - qimyl departamentiniń bastyǵy Tilegen Matkenov IIM-niń onlain baspasóz máslihatynda.
Zerthanany tintý barysynda himiialyq reaktivter, esirtkini daiyndaýǵa arnalǵan qurylǵylar men komponentter, aýany tazartý júieleri anyqtalǵalǵan.
«Qandai qaiǵyly jaǵdaidyń aldy alynǵanyn kózińizge elestetip kórý úshin myna mysaldy keltireiin: osy fakt boiynsha ǵana zaisyz ainalymnan mefedronnyń bir rettik 40 myń doza tárkilendi. Onyń jalpy quny 240 mln teńgeni quraidy», - dedi ol.
Tilegen Matkenov atap ótkendei, zańnamalyq turǵyda qabyldanǵan sharalardyń arqasynda snitetikalyq esirtkilerge qarsy kúres qarqyny kúsheie túsken. Naqtyraq aitqanda esirtkiniń jańa 89 túri baqylaýǵa alynatyn tizimge engizilgen.
