© Sputnik/Ertai Sarbasov
Almatyda Jeńis kúnine orai uiymdastyrylǵan “Máńgilik dańq” sherýi biyl da halyqtyń birligi men tarihi jadynyń aiqyn kórinisine ainaldy, dep habarlaidy Ult.kz.
Qala turǵyndary men qonaqtary batyr babalarǵa taǵzym etý úshin ortalyqqa aǵyldy.
Shara 28 panfilovshylar saiabaǵy aýmaǵyndaǵy Dańq memorialynan bastaldy. Munda jinalǵan jurt aldymen gúl shoqtaryn qoiyp, Uly Otan soǵysynda erlikpen qaza tapqan jaýyngerlerdi únsiz eske aldy. Osydan keiin myńdaǵan adamnyń qatysýymen “Máńgilik dańq” sherýi bastaý aldy.
Qoldaryna ata-babalarynyń fotosýretterin ustaǵan almatylyqtar bir sapqa tizilip, soǵys jyldarynyń aýyr júgin arqalaǵan urpaqqa qurmet kórsetti. Bul sherý – tek estelik emes, ol ulttyń tarihi jadyn jańǵyrtatyn, erlik pen eldiktiń mánin uǵyndyratyn taǵylymdy shara.
Memorial mańynda merekelik kóńil-kúi jalǵasyp, otandyq estrada juldyzdarynyń qatysýymen kontsert uiymdastyryldy. Sonymen qatar, soǵys ardagerleri men tyl eńbekkerlerine arnaiy dastarqan jaiylyp, dalalyq-áskeri as usynyldy.
“Máńgilik dańq” sherýiniń basty maqsaty – keiingi býynǵa batyrlyq murany aman jetkizý, el tarihyn umyttyrmaý. Almatydaǵy búgingi kórinis osy maqsattyń oryndalyp jatqanyn anyq ańǵartty.
