Almatyda kúnine COVID-19 aýrýymen 50 naýqas aýrýhanaǵa jatqyzylady. Bul týraly qalalyq qoǵamdyq densaýlyq saqtaý departamentiniń bastyǵy Nariman Tabynbaev onlain brifingte aitty, dep habarlaidy QazAqparat.
«Qaladaǵy epidemiologiialyq jaǵdai turaqty. Biz koronavirýspen kúreste júieli sheshimder men tiimdi tásilderdi jedel júzege asyra aldyq. Qazir barlyq deńgeide aýqymdy jumystar júrgizilýde. Degenmen, sońǵy ýaqytta jiti respiratorlyq aýrýlarmen jáne tumaýmen aýyratyndar sanynyń artýy, sondai-aq COVID-19 boiynsha statistika birshama irkilis týdyrýda. Biz «sary aimaqta» turaqty turmyz jáne koronavirýsqa shaldyqqandar sany kún saiyn 90 adamnan tómen túspeidi. Sonymen qatar, KVI diagnozy bar patsientterdiń sany ósýde, iaǵni, kovidti pnevmoniia. Birinshiden, biz bul kórsetkishterdi virýs infektsiialarynyń maýsymdyq sharyqtaý shegimen bailanystyramyz. Jalpy, qalanyń densaýlyq saqtaý júiesi COVID-pen kúresýge beiimdelgen jáne ártúrli stsenariilerge daiyn», - deidi qalanyń bas dárigeri.
Almatyda pandemiia bastalǵaly beri KVI-diń 19 138 jaǵdaiy tirkeldi. Sońǵy táýlikte 105 jańa jaǵdai anyqtaldy.
«Koronavirýspen kúresýge baǵyttalǵan ýaqtyly qabyldanǵan sheshimder óz nátijesin beredi. Infektsiialyq statsionarlardyń júktemesi azaidy, búginde 1 261 tósek jumys isteidi, bul rette jalpy sanynyń 68% - y nemese 5 145 tósek rezervte tur. Qazirgi ýaqytta táýligine orta eseppen 50-ge deiin patsient aýrýhanaǵa jatqyzylady», - dedi ol.
