Almatyda búgin qalalyq qoǵamdyq densaýlyq saqtaý basqarmasynyń basshysy Tileýhan Ábildaev pen qalalyq taýarlar men qyzmetterdiń sapasy men qaýipsizdigin baqylaý departamenti basshysynyń orynbasary Ásel Halyqova brifing ótkizdi, dep habarlaidy "Ult aqparat".
Tileýhan Ábildaevtyń aitýynsha, Almatyda epidahýaldy retteý maqsatynda respýblikalyq biýdjetten 73,5 mln teńge bólingen.
«Bul qarajat maska, dárilik zattardy, qorǵanys quraldaryn satyp alýǵa jumsalady. Odan bólek, qalalyq biýdjetten 94.5 mln teńge qarjy bólindi. Al naýqastardy emdeý aqysy MÁMS qorynan qarastyrylady»,- dedi Tileýhan Ábildaev.
Basqarma basshysynyń aitýynsha, qalada qajetti dári dármek pen zararsyzdandyrý quraldary jetkilikti.
Eske sala ketsek, buǵan deiin densaýlyq saqtaý ministri Eljan Birtanov Qazaqstannyń eki azamatynan koronavirýs infektsiiasy tabylǵanyn málim etken edi. Keiinirek Nur-Sultanda taǵy bir áieldiń qaterli indetti juqtyrǵany anyqtaldy.
