Qazaq estradasynyń tanymal ánshisi, kompozitor Zattybek Kópbosynuly ómirden ótken ata-anasyn eske alyp, kóńilindegi ókinishimen bólisti. Óner iesi anasynyń oryndalmai qalǵan armany týraly aityp, júrek tebirenterlik estelikterin jetkizdi, dep habarlaidy ult.kz.

Ánshi bul týraly "Keshki Almaty" baǵdarlamasynda aitty. Onyń sózinshe, ákesi byltyr 88 jasynda ómirden ótken. Zattybek Kópbosynuly ákesine perzenttik paryzyn ótei alǵanymen, anasyna dál sondai qamqorlyq kórsete almaǵanyna ókinetinin jasyrmady.
"Anama jasai almaǵan qurmetti, perzenttik paryzymdy ákeme jasadym dep oilaimyn. Biraq bir áttegen-ai sol. Anam marqumǵa da solai qurmet kórsetsem ǵoi dep oilaimyn. Ómir boiǵy máńgilik saǵynysh qoi. Ol qaityp kelmeidi", – dedi ánshi.
Óner iesi bala kúnindegi erekshe bir esteligin de bólisti. Aitýynsha, kishkentai kezinde keibir dybystardy durys aita almaǵandyqtan, anasy ony erkeletip "saqaýym" dep ataǵan.
"Kishkentai kezimde tilimdi tósep sóileidi ekem. Bizde ondailardy "saqaý" deidi ǵoi. Meni sheshem "saqaýym" dep erkeletetin edi. Óskennen keiin, úilengennen keiin "Seniń qolyńa ketip qalamyn, saqaýymnyń qolyna baryp turamyn" deitin. Men de jete almadym oǵan, ol kisi de jete almai ketti. Sol bir áttegen-ai", – dep eske aldy kompozitor.
Zattybek Kópbosynuly anasynyń óziniń ónerge degen qabiletin bala kúninen baiqap, ár jetistigine qýanyp otyrǵanyn aitty.
Ánshiniń sózinshe, 1995–1996 jyldary Shymkent telearnasyndaǵy "Terme taǵylymy" baǵdarlamasyna alǵash qatysqanda, anasy oǵan bala kúngi armanynyń birtindep oryndalyp kele jatqanyn aitqan.
"Sheshem aityp bergen edi: "Kishkentaiyńda osylai armandaityn ediń, sol armanyń jailap oryndalyp kele jatyr", – dep. Biraq sheshem meniń búgingi jetken jetistigimdi, 2006 jyldan bergi ómirimdi kóre alǵan joq. Ol kisi 2001 jyly qaityp ketti. Ómir", – dedi ánshi.
Osylaisha óner iesi anasynyń óziniń úlken sahnadaǵy jetistikterine kýá bola almaǵanyn ómirindegi eń úlken ókinishteriniń biri retinde jetkizdi.
Zattybek Kópbosynuly kim?
Zattybek Kópbosynuly – qazaq estradasynyń tanymal ánshisi, kompozitor ári terme oryndaýshysy. Ol 1974 jyly qazirgi Túrkistan oblysy Báidibek aýdanynyń Keńes aýylynda dúniege kelgen.
Óner jolyn 1995 jyly Báidibek aýdanyndaǵy "Shaldar" balalar saz mektebinde muǵalim bolyp bastaǵan. Keiin mádeniet úiinde, "Shanshar" teatrynda jáne Shymkent qalasyndaǵy bilim berý mekemelerinde qyzmet atqarǵan.
2001 jáne 2005 jyldary respýblikalyq "Shalqar termesi" baiqaýynyń laýreaty atanǵan.
Ánshi kópshilikke "Aqmarjan", "Nartáýekel", "Kim oilaǵan?", "Oramal taqqan qyz" jáne "Janym, sen bolmasań" ánderi arqyly keńinen tanyldy.