Almatyda mas er adam azyq-túlik dúkenine júgirip kirip, satýshylardy pyshaqpen úreilendirip, keiin óz-ózine qol jumsaimyn dep qorqytty, dep habarlaidy QazAqparat.
Atalǵan oqiǵa beine kameraǵa túsip, áleýmettik jelide jariialandy.
Oqiǵanyń kýágerleri – «Orbita» yqsham aýdanynyń turǵyndary «102» pýltine qońyraý shalyp, politsiia qyzmetkerlerin shaqyrǵan.
«Býran-125» patrýldik ekipajy oqiǵa ornyna úsh minýttan keiin jetti. Er adam shynymen de qarýly bolǵan. Osy kezde dúken ishinde bolǵan adamdardyń ómirine qaýip tóndirmes úshin politsiia qyzmetkerleri óte muqiiat áreket etti. Mas adamnyń nazaryn basqa jaqqa aýdaryp, dialog quryp, oǵan únsiz jaqyndady. Bir kezde inspektor qarýly adamdy ustap alyp, qolyndaǵy pyshaǵyn julyp úlgeredi. Anyqtalǵandai, bul - alkogoldik ishimdikterdi asyra paidalanatyn adam retinde profilaktikalyq esepte turǵan 1978 jyly týǵan B.esimdi jergilikti turǵyn bolyp shyqty. Abyroi bolǵanda, eshkim zardap shekken joq», - dedi Bostandyq aýdandyq politsiia basqarmasynyń bastyǵy, politsiia polkovnigi Dýman Aýhadiev.
Spikerdiń aitýynsha, er adamdy meditsinalyq tekserýge alyp ketti. Oqiǵanyń mán-jaiy anyqtalýda. Keiin oqiǵaǵa qatysy bar adamnyń áreketine quqyqtyq baǵa beriletin bolady.
