Almatyda qarý-jaraq arsenaly saqtalǵan taǵy bir oryn tabyldy, dep habarlaidy QazAqparat.
Almaty qalasynyń kriminaldyq politsiia qyzmetkerleri QR UQK Almaty departamentiniń kómegimen Medeý aýdanyndaǵy baǵbandyq seriktestikterdiń biriniń aýmaǵynan qarý jasyrylǵan oryndy tapty.
«Ol jerde qańtardaǵy tártipsizdikter kezinde Almaly aýdanyndaǵy qarý-jaraq dúkeninen urlanǵan Saiga-410K tegis uńǵyly karabin, PM travmatikalyq tapanshasy, 2 IJ tegis uńǵyly myltyǵy, Makarov júiesi tapanshasynyń patrondary, 9 mm kalibrli, 12 kalibrli patrondar, sondai-aq 7,62 kalibrli patrondar jasyrylǵan. Tárkilengen qarý saraptamaǵa jiberildi», - dep habarlady Almaty qalalyq politsiia departamentinen.
Atalǵan derek Medeý aýdandyq politsiia basqarmasynda QR QK-niń 287-baby 3-bóligi boiynsha tirkeldi.
«Arsenaldyń qaidan shyqqany tergeý amaldary men jedel is-sharalar júrgizilgennen keiin belgili bolady», - dep atap ótti vedomstvodan.
