Almatyda epidemiologiialyq jaǵdai áli de kúrdeli. Bul týraly onlain brifing barysynda Almaty qalasy sanitariialyq-epidemiologiialyq baqylaý departamentiniń basshysy, qalanyń bas memlekettik sanitar dárigeri Jandarbek Bekshin málim etti, dep habarlaidy "Ult aqparat".
«Almaty qalasynda koronavirýs boiynsha epidemiologiialyq jaǵdai áli de kúrdeli. Táýligine 1500-den astam jaǵdai turaqty túrde tirkelip otyr. Bul jaǵdai 28 shildeden bastap jalǵasyp keledi. Tamyz aiynan búgingi kúnge deiin 24,3 myń jaǵdai, jyl basynan beri 105,6 myń jaǵdai tirkeldi», - deidi ol.
Onyń aitýynsha, ótken aptada koronavirýs juqtyrǵandar sany sál tómendedi.
«Táýliktik ósim tamyzdyń alǵashqy kúnderindegi 1,5%-dan búgingi kúnge 1,22%-ǵa deiin tómendedi. Desekte, sońǵy aptadaǵy «simptomdyq» naýqastardyń salystyrmaly salmaǵy aldyńǵy aptamen salystyrǵanda 93%-dan 94%-ǵa deiin artty, bul ainalymdaǵy COVID-19 nusqasynyń joǵary patogendiligin kórsetedi», - deidi Jandarbek Bekshin.
Sonymen qatar, ol Almaty qalasyndaǵy epidemiologiialyq jaǵdai kontagiozdy mýtatsiialanǵan «delta» shtamynyń taralýyna bailanysty kúrdelene túskenin atap ótti.
