Foto: istockphoto.com
Almaty politsiiasy kámeletke tolmaǵan eki jasóspirim qaza tapqan jappai tóbeleske qatysty tergeý derekterin jariialady. Kisi óltirý kúdigimen úsh adam qamaýǵa alyndy, dep habarlaidy Ult.kz.
Qaiǵyly oqiǵa 30 sáýirge qaraǵan túni bolǵan. Aldymen kompiýter klýbynda bastalǵan janjal kóshede jappai tóbeleske ulasqan. Sonyń saldarynan 17 jastaǵy eki jasóspirim pyshaq jaraqatyn alyp, aýyr halde aýrýhanaǵa jetkizilgenimen, dárigerler olardyń ómirin saqtap qala almady.
Qaza tapqandardyń týystarynyń aitýynsha, jaralanǵandardyń biri aldymen politsiia bólimshesine jetkizilip, meditsinalyq kómek kesh kórsetilgen. Alaida politsiia bul derekterdi joqqa shyǵarǵan.
Almaty politsiia departamentiniń resmi ókili Saltanat Ázirbek tóbeleske shamamen 12 adam qatysýy múmkin ekenin aitty. Onyń sózinshe, úsh kúdiktige “Kisi óltirý” baby boiynsha aiyp taǵylyp, olar qamaýǵa alynǵan. Qalǵan qatysýshylarǵa “Buzaqylyq” baby boiynsha is qozǵalǵan.
“Oqiǵanyń barlyq hronologiiasy beinebaqylaý arqyly tolyq qalpyna keltirildi. 103 qyzmetine shaqyrtý túsken sátten bastap, jedel járdemniń kelýi men aýrýhanaǵa jetkizilý ýaqytyna deiin minýtyna deiin belgili. Aýrýhanaǵa jetkizý ýaqyty shamamen 5–6 minýtty quraǵan”, – dedi Saltanat Ázirbek.
Tergeý jalǵasyp jatyr.
