Almatyda buryn politsiia qyzmetkeri bolǵan er adamnyń qazasyna qatysty tergeý júrip jatyr. Aldyn ala nusqalardyń birinde marqumdy áieli órtep jiberýi múmkin degen boljam qarastyrylyp otyrǵany aityldy, dep habarlaidy ult.kz.
Buǵan deiin marqumnyń týystary oqiǵaǵa qatysty óz pikirin bildirgen edi. Endi kúdikke ilingen áieldiń jaqyndary da alǵash ret ún qatyp, otbasyndaǵy jaǵdaiǵa qatysty ózderine belgili málimetterdi jariialady.
Kúdiktiniń sińlisi Rýslan Ótepbaiǵa bergen suhbatynda ápkesi men marqumnyń arasyndaǵy qarym-qatynasqa qatysty birqatar jaitty aitty. Onyń sózinshe, er adam áielin ǵana emes, balalaryn da uryp-soqqan.
«Uldaryn tańǵa deiin urǵan. Áielin de uratyn. Ony ózi videoǵa túsirip alatyn bolǵan. Ony ápkem aitty. Ápkem qansha ketip qalsa da, kúieýi kelip alyp ketetin. Bilmeimin, qorqytady ma, ne úshin ketetinin túsinbeitinbiz», – dedi ol.
Kúdiktiniń týystary istiń barlyq mán-jaiy tolyq ári jan-jaqty zerttelýi kerek dep sanaidy. Olar tergeý aiaqtalmai turyp, oqiǵaǵa qatysty birjaqty pikir qalyptastyryp, asyǵys qorytyndy jasamaýǵa shaqyrdy.
Qazirgi ýaqytta is boiynsha tergeý amaldary jalǵasyp jatyr. Oqiǵanyń naqty mán-jaiy men kúdiktiniń kinási bar-joǵyn quqyq qorǵaý organdary anyqtaidy.
