Jábirlenýshi júrgizýshi Amanbek © almaty.tv
Almatyda taksi júrgizýshisine shabýyl jasap, 18 ret pyshaqtap, kóligin urlap ketken kúdiktiler eki aptadan beri izdetirilip jatyr. Jábirlenýshi aman qalyp, operatsiia jasatqan, - dep habarlaidy Tengrinews.kz agenttigi "Almaty" telearnasyna silteme jasap.
Oqiǵa 12 naýryzda bolǵan. Sol kúni Amanbek qalada taksimen adam tasyp júrgen. Dýman yqshamaýdanynan áýejaiǵa tapsyrys túsken. Mekenjai boiynsha kelgen kezinde úsh jigit kólikten shyǵýyn suraǵan.
"Baýyrym, seniń artqy dóńgelegińniń jeli shyǵyp ketipti", - dedi olar maǵan. Men esh kúdiktenbedim. Qarap shyqtym - dóńgelek bútin, ornymnan tura bergende pyshaq suǵyp aldy", - deidi jábirlenýshi.
Kúdiktiler 18 ret pyshaqtaǵannan keiin jasaǵan isterin jasyryp qalmaq bolǵan. Olar qansyraǵan Amanbekti bailap, belgisiz baǵytta alyp ketken.
"Qoldarynda pyshaq boldy, óltirgisi kelgen shyǵar. Belgisiz jerde toqtap, meni qaldyryp ketti", - deidi ol.
Jábirlenýshiniń ákesi bul oqiǵa týraly túngi 23.00 shamasynda bilgen. Belgisiz bireý habarlasyp, Amanbekti taýyp alǵanyn aitqan. Artynsha ony aýrýhanaǵa jetkizgen, ol jerde meditsina qyzmetkerleri operatsiia jasaǵan.
"Eki qyzy bar, úilengen. Bárimizdiń jaǵdaiymyzdy jasap otyr. Jalǵyz ulym. Kináliler jazasyn alady dep senemin", - deidi júrgizýshiniń ákesi Ahmet.
Qalalyq PD ókilderiniń málimetinshe, kúdiktilerge qatysty qylmystyq is qozǵalǵan. Arnaiy top quryldy, onyń ishinde kriminaldyq politsiia qyzmetkerleri de bar.
"Bul qylmysqa qatysty mindetti túrde tergeý júredi. Is "asa aýyr" dep baǵalanyp otyr, sondyqtan politsiia qyzmetkerleri istiń mán-jaiyn anyqtaý úshin baryn salady", - deidi PD ókili Saltanat Ázirbek.
