Almaty qalasy Bostandyq aýdanynda kópqabatty úidiń mańynan ótip bara jatqan áieldiń basyna muz túsip ajal qushty, dep habarlaidy Sputnik.
Qaiǵyly jaǵdai 20 qarasha kúni saǵat 13:45 shamasynda Ál-Farabi dańǵylynan tómen Markov kóshesiniń boiynda boldy. Politsiianyń aldyn ala nusqasy boiynsha, Adal Residence turǵyn úi kesheniniń janynan ótip bara jatqan áiel basyna 11-qabattan muz túsip kóz jumǵan.
Qaiǵyly jaǵdaidy kýágerler videoǵa túsirip alǵan.
"Qazirgi sátte marqum áieldiń kim ekeni anyqtaldy. Ol kózi tirisinde jaqyn mańaidaǵy úide turǵan. Aýyr jaraqat saldarynan 60 jastaǵy jábirlenýshi sol jerde kóz jumdy", — dedi Almaty qalasy politsiia departamentiniń resmi ókili Saltanat Ázirbek.
Onyń aitýynsha, oqiǵa bolǵan jerde tergep-tekserý toby jumys istegen. Fakti sotqa deiingi tergep-tekserýdiń biryńǵai tizimine tirkelgen.
Oqiǵaǵa qatysty Almaty qalasy Bostandyq aýdanynyń ákimdigi de túsinik berdi.
Aýdandyq kommýnaldyq sharýashylyq bóliminiń bas mamany Janat Jaqsybaevtyń aitýynsha, atalǵan úidiń shatyrlaryn tazalaý jumystary ótken aptada ǵana júrgizilgen.
«Tazalaý jumystaryn «Vernyi vybor» páter ieleri kooperativi júrgizdi. Úidiń shatyry muzdan, qardan tazalanǵan. Tek bir páterge ǵana jumysshylar kire almai qoiǵan. Shatyrdy tazalaý úshin jumysshylar 9-qabattaǵy páterge kirýi kerek bolǵan. Al ol páter jabyq bolǵan. Kishkentai ǵana muz súńgisi erigen sýmen qosylyp úlken kesekke ainalǵan da, úzilip túsken», - dedi Janat Jaqsybaev.
Onyń aitýynsha, marqum bolǵan áiel atalǵan úidiń turǵyny emes. Aýdan ákimdigi onyń jaqyndaryna barynsha kómek kórsetpek.
«Ótemaqy máselesin aýdan basshylyǵymen aqyldasa otyryp qarastyramyz. Ázirge qaitys bolǵan áieldiń týystarymen habarlasyp, qandai kómek qajettigin anyqtaimyz», - dedi J.Jaqsybaev.
Politsiia kóz jumǵan áieldiń denesin alyp ketti. Al PIK tóraǵasynan jaýap alynyp jatyr.
