Almatyda bastaýysh synyp oqýshylary turǵyn úilerdiń birinshi qabatynda oqýy múmkin. Bul týraly Ortalyq kommýnikatsiialar qyzmeti alańynda ótken baspasóz máslihatynda Almaty qalasynyń ákimi Erbolat Dosaev aitty, dep habarlaidy QazAqparat.
Onyń aitýynsha, memlekettik mektepterdiń bastaýysh synyptaryn filial retinde turǵyn úi keshenderiniń birinshi qabattarynda ornalastyrý tetigi qarastyrylyp jatyr.
«Almatyda «basqarylatyn tapshylyq» orta merzimdi saiasaty iske asyrylatyn boldy. Jańa memlekettik jáne jekemenshik bilim berý obektilerin salý esebinen oryn tapshylyǵy qysqarady. Memlekettik mektepterdiń bastaýysh synyptaryn filial retinde turǵyn úi keshenderiniń birinshi qabattarynda ornalastyrý tetigi qarastyrylyp jatyr. Osylaisha, 2022 jyldyń basynan beri 3 316 oryndyq 54 jekemenshik balabaqsha ashyldy, osy jyldyń sońyna deiin taǵy 1 460 oryndyq 17 balabaqsha, onyń ishinde, 560 oryndyq 2 memlekettik balabaqsha ashylady», - deidi qala ákimi.
Sonymen qatar, megapolis basshysy jyl sońyna deiin 3-6 jas aralyǵyndaǵy balalardy mektepke deiingi bilimmen qamtý 2,4%-ǵa, mektepterdegi oqýshy oryndarynyń sany 5%-ǵa deiin ósetinin atap ótti.
«Biyl orta bilim berý salasynda 13,8 myń orynǵa eseptelgen 18 obektini paidalanýǵa berý josparlanyp otyr. Onyń ishinde 10 750 orynǵa 11 jańa mektep, 1 270 orynǵa 5 qosymsha qurylys, 1 800 oryndyq 2 ǵimaratty satyp alý josparda», - dedi Erbolat Dosaev.
