Almatyda bir apta buryn iz-túzsiz joǵalǵan boijetken zorlyq-zombylyqpen óltirilgeni anyqtaldy. Bul týraly Almaty qalalyq Politsiia departamentiniń baspasóz qyzmetinen málim etti, dep habarlaidy "Ult aqparat".
1999 jyly týǵan Almaty oblysy Qarasai aýdanynyń turǵyny V.Pogrebniaktyń iz-túzsiz joǵalǵany jaily aqparat politsiiaǵa 25 qańtarda túsken.
«Tergeý sheńberinde jedel-tergeý toby qyzdyń qaida ekenin anyqtaýǵa baǵyttalǵan birqatar shara ótkizdi. Sonymen qatar, V.Pogrebniaktyń joǵalǵanǵa deiin qasynda bolǵan dosy - 2000 jyly týǵan azamat B.-dan jaýap alyndy. Onyń jaýaby ózge málimettermen sáikes kelmedi», - delingen Politsiia departamentiniń málimetinde.
Anyqtalǵandai, qyzdyń joǵalýyna azamat B.-nyń qatysy bar bolyp shyqqan. Ol tergeý barysynda boijetkendi óltirgenin moiyndap, onyń denesin jasyrǵan oryndy kórsetken.
«Belgili bolǵandai, B. óziniń júrip júrgen qyzyn, ózderi turatyn aýyldyń janynda óltirgen. Sebep - qyzǵanyshta. B.-nyń jaýabyna súiensek, aýyldan shyǵa beriste olardyń arasynda urys bolǵan. Saldarynan ol Valeriiany óltirgen. Qylmys izin jasyrý úshin jas jigit qyzdyń denesin kómip tastaǵan. Óziniń qylmystyq piǵylyn jalǵastyryp, Valeriianyń ata-anasyna ótirik aitqan. Iaǵni, Valeriia qalaǵa aparyp tastaýyn ótinip, keiin esh sebepsiz ketip qalǵany týraly ata-anasyna jalǵan aqparat bergen», - delingen habarlamada.
Áýezov aýdanynyń politsiia basqarmasy buǵan deiin qozǵalǵan isti «Adam óltirý» babyna qaita ózgertti. Kúdikti jigit qamaýǵa alyndy.
