Almatyda 18 jastaǵy stýdent qyz bosanǵan nárestesin qoqys jáshigine tastap ketken. Tastandy sábidi tańǵy ýaqytta qaladaǵy joǵary oqý oryndarynyń biriniń jataqhanasy mańynan ótip bara jatqan adam kórip qalǵan, - dep habarlaidy patrul.kz.
Basylymnyń málimetinshe, sábi shamamen tańǵy saǵat altyda Baitursynov kóshesinde Tóle bi men Qarasai batyr kósheleriniń arasynan tabylǵan. Ótip bara jatqan adam politseiler men jedel járdemdi shaqyrǵan. Dárigerler jańa týǵan sábidi aýrýhanaǵa jetkizgen.
Birneshe saǵattan keiin politsiia qyzmetkerleri sábidiń anasyn jaqyn mańdaǵy jataqhanadan tapty. Ol Qyzylorda oblysynyń týmasy bolyp shyqty, Almatydaǵy JOO-lardyń birinde 2-kýrsta oqidy eken. Qyz aýyr jaǵdaida bolǵandyqtan, oǵan meditsinalyq kómek qajet bolǵan. Sodan ol jaqyn mańdaǵy qalalyq aýrýhananyń jansaqtaý bólimine jetkizilgen. Aldyn ala boljam boiynsha, ol sábidi jataqhana bólmesinde ózi bosanǵan.
Almaty qalalyq Densaýlyq saqtaý basqarmasy baspasóz qyzmetiniń málimetinshe, dárigerler sábidi aman alyp qalý úshin baryn salǵan. Alaida, ókinishke qarai, sábidiń ómirin aman alyp qalý múmkin bolmaǵan. Jańa týǵan sábi qatty álsirep, aýrýhanaǵa jetkizilgen soń kóz jumǵan.
